Jamarbër Malltezi e ka cilësuar si një “gjueti shtrigash” procesin penal që po zhvillohet ndaj tij dhe të pandehurve të tjerë në dosjen “Partizani”.
Në një deklaratë për mediat jashtë ambienteve të Prokurorisë së Posaçme, ai akuzoi kryeministrin Edi Rama se qëndron pas nisjes së hetimeve dhe sulmoi SPAK-un, duke e konsideruar si një institucion që zbaton urdhrat politikë.
“Që në ditën e parë ka qenë e qartë se kjo është një çështje politike dhe qesharake. U ngrit mbi një kallëzim të rremë nga Taulant Balla dhe shpejt pas fjalës së Ramës në kongresin e PS në prill 2022, SPAK bëri 16 kërkesa brenda një muaji në të gjitha institucionet”, deklaroi Malltezi.
Ai përdori një krahasim ironik me sagën e “Harry Potter”, duke thënë se Rama është kthyer në “Voldemort”, “ai që nuk guxon të përmendet me emër”. “Por ne do të përballemi edhe me Voldemortin”, shtoi ai.
Malltezi theksoi se nuk ka asnjë element penal në dosje dhe se zhvillimet në pronën në fjalë janë kryer në përputhje me ligjin.
Sipas tij, janë paguar taksat, janë sistemuar 42 familje dhe janë ndërtuar objekte publike si çerdhe dhe kopshte për komunitetin.
“Ndërkohë, Edi Rama fal prona për klientët dhe hajdutët e tij dhe për këto SPAK nuk reagon,” tha ai.
Ai përsëriti se çështja është e motivuar politikisht dhe e ndërtuar mbi “manipulime dhe krahasime të rreme me vendime të qeverisë”.
SPAK, të cilin e quajti “SKAP”, sipas tij, vepron me porosi dhe nuk heton në mënyrë të pavarur.
Malltezi akuzohet për korrupsion pasiv dhe pastrim parash, ndërsa SPAK pretendon se ai ka përfituar mbi 5.4 milionë euro përmes vendimeve të favorizuara nga qeveria në kohën kur Sali Berisha ishte kryeministër.
Ai, Berisha dhe tre persona të tjerë përballen me akuzat në një proces që vazhdon të jetë në fazë themeli.
