Sot nis gjykimi për rastin e vrasjes së Liridona Ademajt.
Lajmin e ka bërë të ditur vëllai i saj, Leonard Ademaj, përmes një postimi në Facebook, ku ka ndarë detaje mbi procesin dhe ka theksuar besimin e familjes në sistemin e drejtësisë.
“Ju njoftoj që gjykimi i rastit të vrasjes dinake të motrës tonë Liridona Ademaj fillon nesër në ora 11.00 në Departamentin për Krime të Rënda në Gjykatën Themelore në Prishtinë. Ne si familje besojmë në drejtësi dhe shpresojmë që gjykimi do të jetë efikas, profesional, pa gabime, pa vonesa dhe transparent”, shkruan ai.
Fillimisht, ngjarja u raportua si “grabitje me pasoja fatale”, por pas dy ditësh hetime, policia e Kosovës arrestoi katër persona.
Në mesin e të akuzuarve është edhe bashkëshorti i Liridonës, Naim Murseli, i cili akuzohet për vrasjen.
Të akuzuarit e tjerë janë Kushtrim Kokalla, Granit Plava dhe Tom Dodaj.
Gjykimi pritet të zbardhë të gjitha rrethanat e ngjarjes dhe të përcaktojë përgjegjësitë penale të secilit të akuzuar.
