Kryeministri i vendit Edi Rama dhe ministri Bledi Çuçi, paralajmëruan disa ditë më parë reformim në Policinë e Shtetit. Ditën e sotme mësohet se është liruar nga detyra që mbante si Drejtor i Departamentit për Sigurinë në Policinë e Shtetit, Gjovalin Loka. Burime bëjnë me dije se ai pritet që të emërohet në një tjetër detyrë.
Loka e mbante këtë detyrë që prej 15 shkurtit të vitit 2018, ndërsa më herët ka mbajtur edhe disa pozicione të tjera drejtuese. Nga shef i Komisariatit nr. 1 në Tiranë, Loka vijoi më pas në disa nga drejtoritë më të rëndësishme të vendit, si ajo e Lezhës, Shkodrës dhe Vlorës.
Kujtojmë se dy ditë më parë kryeministri Edi Rama dhe ministri i Brendshëm Bledi Çuçi paralajmëruan ndryshime në strukturat e Policisë së Shtetit, pas ngjarjes tragjike që ndodhi në Velpojë, ku pas një konflikti për shezlongët mbetën të vrarë 4 persona dhe u plagosën rëndë dy të tjerë.
Në fjalën e tij Çuçi u shpreh se brenda javës do të niste një ndryshim i thellë në nivel qarku dhe më pas do të vazhdojë me drejtorët në çdo qytet të Shqipërisë.
“Brenda javës do të nisë një ndryshim i thellë me drejtuesit në nivel qarku, ku do të nisë më pas dhe me drejtoreve në çdo qytet të Shqipërisë. Nga ana tjetër, do të çohet më tej dhe do të përfundojë pajisja e policisë rrugore me kamera.
Më lejoni të përfundoj që ne jemi të vetëdijshëm për sfidat e kohës dhe shumë shpejt të gjithë do e prekin ndryshimin e mëtejshëm për të mirën e Policisë së Shtetit. “, tha ministri i Brendshëm, Bledi Çuçi.
