Muajt e verës kanë qenë shumë të zënë për kontabilistët. Deri në 30 qershor duhet të kryehej deklarimi i pronarëve përfitues. Në 1 korrik filloi procesi i fiskalizimit për transaksionet pa para mes bizneseve dhe në 1 shtator pritet të fillojë ky proces për të gjithë. Ndërkohë, deri në 31 korrik, subjektet duhet të dorëzojnë online pasqyrat financiare.
Qendra Kombëtare e Biznesit (QKB) ka rikujtuar së fundmi subjektet se bazuar në nenin 43, të Ligjit nr. 9723, datë 03.05.2007, “Për regjistrimin e biznesit”, i ndryshuar, subjektet duhet të regjistrojnë dhe depozitojnë pasqyrat financiare vjetore, raportin e ecurisë së veprimtarisë dhe raportin e auditimit, të mbajtur sipas kërkesave ligjore, në rastet kur mbajtja e këtyre dokumenteve është e detyrueshme, jo më vonë se 7 muaj nga data e mbylljes së çdo viti financiar, në të kundërt aplikohet sanksion administrativ gjobë, prej 15000 lekë, shkruan Monitor.
Afati përfundimtar, për dorëzimin e këtyre dokumentave është data 31 korrik 2021. Dorëzimi i pasqyrave financiare do të kryhet në formatin Excel, nëpërmjet portalit qeveritar e-Albania.
Përgjithësisht, subjektet i bëjnë deklarimet në ditët e fundit të afatit, çka shpesh ka bërë që në fund të korrikut të ketë mbingarkesë në sistem. Më herët, tatimet kanë njoftuar se formati që dorëzohet në Qendrën Kombëtare të Regjistrimit (QKB), konkretisht:
– Bilanci (aktivet, pasivet dhe kapitali);
– Pasqyra e të ardhurave dhe shpenzimeve;
– Pasqyra e ndryshimeve në kapital, pasqyra e fluksit të parasë ose pasqyra e qarkullimit të likuiditeteve (cash-flow);
– Aneksi për shpjegimet shpjeguese.
Manuali i përdorimit për dorëzimin e bilancit gjendet në link: https://qkb.gov.al/media/38129/manuali-i-perdorimit-per-bilancin.pdf
