Ka nisur prej ditës së djeshme pelegrinazhi i madh i Bektashinjve në malin e Tomorrit, një traditë që mbledh çdo vit mbi 600 mijë besimtarë nga Shqipëria, diaspora dhe vende të tjera të botës. Pelegrinazhi do të zgjasë shtatë ditë, nga 18 deri më 25 gusht, me kulmin e festës në Teqenë e Kulmakut, ku kryhen ritet fetare në nder të Baba Tomorrit.
Për të siguruar mbarëvajtjen e festës, Drejtoria Vendore e Policisë Berat ka shpallur një plan të detajuar masash. Strukturat e policisë, në bashkëpunim me FNSh Fier, njësitë operacionale për sigurinë rrugore, forcat zjarrfikëse, spitalin rajonal, pushtetin vendor dhe Kryegjyshatën Botërore Bektashiane, janë angazhuar për të garantuar rendin, sigurinë publike dhe qarkullimin e mjeteve e këmbësorëve.
Policia ka përcaktuar itineraret e lëvizjes së mjeteve për ngjitjen dhe zbritjen nga mali, si dhe kufizime të veçanta:
Qarkullimi drejt Teqesë së Kulmakut do të bëhet nga hyrja e qytetit të Beratit, rrethrrotullimi i Kombinatit, unaza e qytetit, rrethrrotullimi i Uznovës, kryqëzimi i Plirëzit deri në Teqe.
Zbritja nga mali do të bëhet në itinerarin: Teqeja e Kulmakut–Bargullaz–Pronovik–Poliçan–Uznovë–rruga kryesore “Antipatrea”–rrethrrotullimi i Kombinatit.
Pelegrinët nga Çorovoda do të përdorin aksin Çorovodë–Gjerbës–Teqeja e Kulmakut dhe anasjelltas.
Kufizimet parashikojnë ndalim qarkullimi për mjetet e tonazhit të rëndë në disa akse kryesore nga ora 06:00 deri në 24:00 gjatë gjithë ditëve të pelegrinazhit. Autobusët dhe furgonat me mbi 8 persona nuk do të lejohen në segmentin Plirëz–Teqeja e Kulmakut, ndërsa në këtë rrugë qarkullimi do të kryhet vetëm në kolonë, pa parakalime. Po ashtu, ndalohet qëndrimi i mjeteve në akse rrugore jashtë zonave të caktuara.
Mali i Tomorrit, 2416 metra mbi nivelin e detit, çdo vit kthehet në qendër të këtij pelegrinazhi, ku besimtarët vendosin çadra, kryejnë kurbane dhe falen për shëndet, mirësi e paqe. Teqeja e Kulmakut është hapur disa ditë më parë dhe është përgatitur me ndriçim, ujë të pijshëm dhe ambiente të përshtatura për pritjen e pelegrinëve.
Festimet kulmojnë pranë varrit të Abaz Aliut, ku çdo besimtar i bashkohet riteve dhe sjell kurbanin si shenjë mirësie dhe bekimi për familjen.
