Në Serbi ka nisur çmontimi i barrikadave dhe rikthimi gradual i trafikut, pas bllokimeve masive të rrugëve në disa qytete të vendit nga mijëra protestues antiqeveritarë në orët e para të 30 qershorit.
Demonstruesit kërkojnë lirimin e personave të ndaluar nga policia gjatë protestës së fundit.
Lëvizja, e udhëhequr nga studentët, shënoi një përshkallëzim të presionit ndaj presidentit Aleksandër Vuçiç.
Në Beograd, protestuesit përdorën barrikada metalike dhe kosha mbeturinash për të bllokuar rrugët kryesore, përfshirë urën Gazela mbi lumin Sava.
Sipas mediave, në qytetin Novi Sad, epiqendra e protestave që nisën tetë muaj më parë manifestuesit rrethuan selinë e Partisë Progresive Serbe, duke qëlluar ndërtesën me vezë. Në kryeqytet u raportuan rreth 30 pika të bllokuara, ndërsa protesta aktive u zhvilluan në të paktën 22 qytete të tjera.
Tensionet u rritën pas ndalimeve të pjesëmarrësve të protestës së mbajtur më 28 qershor në Beograd. Presidenti Vuçiç ka paralajmëruar arrestime të mëtejshme.
Ndër kërkesat kryesore të studentëve janë mbajtja e zgjedhjeve të parakohshme parlamentare dhe zhvendosja e një kampi në qendër të kryeqytetit, i ngritur nga grupe studentore pro-qeveritare që kundërshtojnë bllokimin e universiteteve.
Universitetet janë të bllokuara që nga nëntori i vitit 2024, kur nisi protesta pas shembjes së një strehe betoni në stacionin hekurudhor të Novi Sadit, ngjarje që mori jetën e 16 personave dhe për të cilën studentët kërkojnë përgjegjësi institucionale.
