Deputeti Gazment Bardhi ka reaguar ashpër për njoftimin që lexoi kryeparlamentarja Lindita Nikolla në mbyllje të seancës së sotme. Njoftimi i bërë nga Lulzim Basha bënte me dije se Bardhi nuk është më pjesë e Grupit Parlamentar të PD, pasi i ka përfunduar anëtarësia.
Bardhi ka akuzuar Nikollën se ka ndërhyrë në punët e brendshme të grupit parlamentar të PD, duke përbërë sipas tij, “aktin më të pashembullt në historinë e pluralizmit politik që mbyll çdo hapësirë institucionale për opozitën në Parlament”.
“Nervozizmi i Edi Ramës për unifikimim e qëndrimit të Shqipërisë me atë të Kosovës, nuk u shfaq vetëm me mungesën e tij skandaloze në votimin për Rezolutën për dënimin e Serbisë, por edhe nga sjellja e paprecedentë e Kryetares së Kuvendit në fund të seancës së sotme të posaçme.
Marrja peng nga Edi Rama e Reformës Zgjedhore dhe rrëzimi i Komisioneve Hetimore të kërkuara nga opozita, si dhe ndërhyrja në kundërshtim me Rregulloren e Kuvendit e Kryetares së Kuvendit në punët e brendshme të grupit parlamentar të PD, përbën aktin më të pashembullt në historinë e pluralizmit politik që mbyll çdo hapësirë institucionale për opozitën në Parlament”, deklaron Bardhi.
