Pasditen e kësaj të diele në fshatin Nen shat të Vaut të Dejës u regjistrua një krim i rëndë, teksa 50-vjeçari Nikolin Hila qëlloi me armë zjarri ish-gruan e tij Gjuliana Topalli 40 vjeçe. Krimin Hila e bëri në sy të të vajzës e babait të paralizuar. Pasi vrau ish-bashkëjetuesen, 50-vjeçari qëlloi veten me plumb në gojë.
Këto detaje tepër tronditëse kanë dalë ditën e sotme, ndërsa zbardhin dinamikën e ngjarjes. Mësohet se krimi erdhi pas një debati të ashpër për vajzën e tyre vetëm 4 vjeçe. Sipas informacioneve paraprake, 50-vjeçari Hila ka kërkuar që ta shohë më shpesh vajzën dhe ta merrte edhe në shtëpinë e tij, gjë për të cilën viktima, Gjuliana Topalli nuk ka qenë dakord.
Bëhet e ditur se kjo nuk ishte zënka e parë mes tyre, pasi edhe herë të tjerë kanë debatuar për këtë çështje. Policia deklaron se Hila ka kryer krimin me një armë zjarri automatik kallashnikov. Ndërkohë [pasi ka qëlluar ish-gruan, Hila ka qëlluar veten dhe më pas është dërguar me urgjencë drejt spitalit të traumës në Tiranë për mjekim më të specializuar. 50-vjeçari Nikolin Hila është arrestuar në spital, ndërsa policia ka nisur hetimet mbi këtë vrasje. Çifti kishte disa kohë që ishte divorcuar, të paktën rreth një vit e gjysmë, dhe pasditen e djeshme pas një debati, Hila la të vdekur ish-gruan e tij.
