Një histori e pazakontë ka ndodhur në shtetin fqinj, Greqi, pasi efektivët e policisë greke në qytetin e Larisas, teksa kanë shkuar të zbardhin rastin e vdekjes së papritur të një pensionisteje 76 vjeçe, por kanë zbuluar edhe një person tjetër në banesë. Bëhet fjalë për një 51-vjeçare, e cila sipas autoriteteve greke rezulton të jetë e bija e pensionistes që ka ndërruar jetë. Policia ka dyshime që 51-vjeçarja është mbajtur e mbyllur në shtëpi nga nëna për plot 42 vite.
Për këtë ngjarje foli nënkryetari i Politikave Sociale të bashkisë së Larisës, i cili kur u pyet nga mediat greke për rastin ekstrem u shpreh se nuk dihet nëse kjo burgosje e fëmijës ka qenë e dhunshme apo e qëllimshme.
Sipas informacioneve të protothema.gr, 51-vjeçarja është gjetur në një ambient normal dhe të pastër, ndërsa sipas vlerësimeve të para, ajo i përket njerëzve që kanë nevojë për mbështetje, pasi duket se është në fazën e autizmit.
Më e çuditshmja në këtë histori është se lagjja ashtu edhe mjedisi më i gjerë familjar e dinin të vërtetën, por nuk ishin shprehur për këtë gjë pranë institucioneve. Kjo ka vënë në pikpyetje shumë gjëra në lidhje me ngjarjen.
Nënkryetari i Politikave Sociale të bashkisë së Larisës, Sotiris Voulgaris, tha për ngjarjen: “Që nga e shtuna kur u zbulua rasti vrapuam për të ndihmuar dhe mbështetur 51-vjeçaren që ndodhej brenda banesës. Ne përpiqemi ta mbrojmë dhe të mësojmë prej saj gjithçka që ka ndodhur në shtëpinë e saj, në mënyrë që të kemi një pamje të qartë. Vajza është nën mbrojtjen dhe mbikëqyrjen e mjedisit të saj më të gjerë familjar. Të gjithë do t’i ndihmojmë që t’i sigurojmë asaj mbrojtje dhe cilësi sa më të mirë të jetës, siç e ofrojnë shërbimet sociale”.
Në detajet e zbardhura rezulton se 51-vjeçarja ishte mbyllur në këtë banesë pasi ishte larguar nga shkolla në moshën 9-vjeçare, kur ishte nxënëse e klasës së tretë të shkollës fillore. Kjo mendohet të këtë çuar në mbylljen e plotë të saj nga vetë e ëma.
“Ne po shqyrtojmë gjithçka. Fatkeqësisht, shkollat në kohën kur ky fëmijë po rritej pak a shumë i refuzonin këta njerëz. Nuk kishte shkolla speciale atëherë pas vitit 1984 dhe dalëngadalë filloi të shfaqej me druajtje në qytetet e mëdha. E sigurt është se kjo grua i përket grupit të njerëzve që kanë nevojë për mbështetje”, theksuan autoritetet greke.
