Kreu i Partisë Demokratike, Lulzim Basha nga qyteti i Durrësit ku po vazhdon takimet elektorale për zgjedhjet e 25 prillit , ka thënë se refuzojnë dhunën. Kreu i PD-së nuk e ka përmendur ngjarjen e Elbasannit ku mbeti i vrarë, Pjerin Xhuvani dhe u plagosën 4 persona të tjerë, por ka theksuar se nuk ka shit-blerje të votave që e ndal ndryshimin.
Basha ka theksuar se ata e mbrojnë me çdo çmim demokracinë dhe se fitorja ka zbritur në zemrat e çdo qytetari. Para qindra mbështetësve të Partisë Demokratike, të cilët nuk kanë zbatuar masat e vendosura nga Komiteti Teknik i Ekspertëve, për shkak të pandemisë së COVID-19, Basha tha se e diela është dita e fitores. Gjithashtu ai i ka quajtur 8 viteve e qeverisjes nga kryeministri Edi Rama si dështim.
“Dita e diel është dita e ndryshimit, është dita e fitores. Fitorja më e bukur dhe më e çmuar, do t’i takojë të gjithë shqiptarëve. Qeveria e ndryshimit që do të sillni me votën tuaj për numrin 9 do ti takojë çdo shqiptari. Tetë vite të gjata dhe të vështira, plot dështime me premtime të pambajtura edhe tre ditë për të vendosur. Bashkë për ndryshim. Të dielën Rama humb dhe Shqipëria fiton. Ndal bandave dhe shitblerjes së votave. Po e mbyll këtë mbrëmje në Durrësin e lashtësisë dhe vlerave. Ditëve të fundit i është vërsulur me marifetet e vjetra por e ka kot. Shikojeni fuqinë, energjinë e pandalshme të ndryshimit që po vjen,” deklaroi Basha.
