Për të 43-ën herë me radhë, deputetët e Kuvendit të Kosovës do të mblidhen sot në përpjekje për të vazhduar seancën konstituive të legjislaturës së nëntë, të dalë nga zgjedhjet e 9 shkurtit.
Procesi po zvarritet prej muajsh dhe seanca e fundit, e mbajtur më 5 korrik, u ndërpre sërish, këtë herë pas një alarmi të rremë për bombë. As ky takim nuk solli ndonjë zgjidhje, duke e thelluar më tej krizën institucionale.
Presidentja Vjosa Osmani ka zhvilluar disa raunde bisedimesh me përfaqësuesit e partive parlamentare, duke bërë thirrje për konsensus dhe duke paralajmëruar pasoja juridike nëse Kuvendi nuk konstituohet deri më 26 korrik.
Edhe pse Gjykata Kushtetuese ka përcaktuar se Kuvendi duhet të formohet brenda 30 ditëve nga shpallja e aktgjykimit të 26 qershorit, nuk janë specifikuar masat që do të ndërmerren në rast të mosrespektimit të afatit.
Osmani ka deklaruar se, nëse ngërçi vazhdon, do t’i drejtohet sërish Gjykatës.
Bllokada politike është përqendruar te zgjedhja e kryetarit të Kuvendit. Propozimi i Vetëvendosjes për t’i dhënë këtë post ministres në detyrë të Drejtësisë, Albulena Haxhiu, është kundërshtuar nga partitë e tjera të mëdha, të cilat e cilësojnë atë si “figurë përçarëse” dhe kërkojnë një emër alternativ.
Vetëvendosje, megjithatë, mbetet e palëkundur në qëndrimin e saj, duke theksuar se si fituese e zgjedhjeve ka të drejtën legjitime për të propozuar kandidatin për kryetar të Kuvendit dhe se Haxhiu e meriton postin.
Konstituimi i Kuvendit është parakusht për formimin e Qeverisë së re. Deputetët duhet fillimisht të zgjedhin kryetarin dhe pesë nënkryetarët për të hapur rrugën për ndërtimin e institucioneve të reja.
