Deputetët e Kuvendit të Kosovës do të mblidhen sërish sot për të vijuar përpjekjet për konstituimin e legjislaturës së nëntë, e cila doli nga zgjedhjet e parakohshme të 9 shkurtit.
Kjo është tentativa e 23-të për të formuar institucionin më të lartë ligjvënës të vendit, i cili vijon të mbetet i bllokuar për shkak të mungesës së shumicës për zgjedhjen e kryetarit të Kuvendit.
Lëvizja Vetëvendosje, në koalicion me Guxo dhe Alternativën, nuk ka arritur të sigurojë 61 votat e nevojshme për të zgjedhur Albulena Haxhiun si kryeparlamentare.
Propozimi i saj është kundërshtuar nga PDK dhe AAK, të cilat kërkojnë një emër alternativ, ndërkohë që LDK ka kundërshtuar sistematikisht çdo kandidaturë të paraqitur nga Vetëvendosje.
Situata është komplikuar më tej pasi AAK ka kërkuar një interpretim nga Gjykata Kushtetuese lidhur me ligjshmërinë e votimit të fshehtë për postin e kryetarit të Kuvendit.
Gjykata ka konfirmuar se kërkesa është në shqyrtim dhe palët do të njoftohen për vendimin sapo ai të merret.
Më 15 maj, presidentja Vjosa Osmani organizoi një takim me liderët politikë për të zgjidhur ngërçin, por pa sukses. Edhe faktori ndërkombëtar ka reaguar, duke shprehur shqetësim për vonesat në formimin e institucioneve të reja.
Në seancat e mëparshme është pamundësuar ngritja e komisionit që do të organizonte votimin e fshehtë, për shkak të mungesës së kuorumit.
Edhe propozimet e përsëritura nga kryesuesi Avni Dehari për zhvillimin e votimit nuk kanë gjetur mbështetje të mjaftueshme në sallë.
