Për herë të 38-të me radhë, deputetët e Kuvendit të Kosovës pritet të mblidhen sot për të tentuar përfundimin e seancës konstituive të legjislaturës së nëntë, të dalë nga zgjedhjet e 9 shkurtit.
Prej më shumë se katër muajsh, vendi ndodhet në një ngërç institucional, pasi Kuvendi nuk ka arritur të zgjedhë organet drejtuese, çka ka bllokuar edhe krijimin e qeverisë së re.
Në seancën e fundit, të 37-tën me radhë, si edhe në të gjitha përpjekjet e mëparshme, deputetët nuk arritën të miratojnë ngritjen e një komisioni që do të mbikëqyrte votimin e fshehtë për zgjedhjen e kryetarit të Kuvendit, një hap kyç për të vijuar më tej me procesin konstituiv.
Sipas Kushtetutës, e drejta për të propozuar kandidatin për kryetar të Kuvendit i takon partisë fituese të zgjedhjeve, Lëvizjes Vetëvendosje.
Ky subjekt ka propozuar deputeten Haxhiu për këtë post, por përballë këtij emri ka pasur kundërshtime të forta nga PDK dhe AAK, të cilat e konsiderojnë atë një figurë përçarëse dhe kërkojnë që Vetëvendosje të propozojë një kandidat tjetër.
Për të dalë nga ngërçi, LDK ka propozuar një plan me 15 pika për formimin e një qeverie uniteti, duke ftuar të gjitha partitë të bëhen pjesë e saj. Por propozimi është refuzuar nga Vetëvendosje, ndërsa PDK dhe AAK kanë shprehur vullnetin për të ndërtuar një qeveri të re pa pjesëmarrjen e LVV-së, duke synuar një bashkim të forcave opozitare të legjislaturës së kaluar.
Megjithatë, pa u konstituar Kuvendi – pra, pa zgjedhjen e kryetarit dhe pesë nënkryetarëve me shumicën prej 61 votash, asnjë hap tjetër institucional nuk mund të ndërmerret.
Në këtë situatë, Gjykata Kushtetuese ka vendosur ndërhyrjen e saj, duke urdhëruar që procesi konstituiv i Kuvendit të përmbyllet brenda 30 ditëve, përndryshe deputetët do të shkelin detyrimet kushtetuese.
