Presidentja e Kosovës, Vjosa Osmani, njoftoi tërheqjen e kërkesës së dorëzuar më 22 korrik në Gjykatën Kushtetuese, që lidhej me seancën konstituive të Kuvendit të ri.
Arsye kryesore për këtë vendim është përzgjedhja e gjyqtarit serb Radomir Llaban si raportues në këtë çështje, i cili, sipas raporteve të institucioneve të sigurisë të viteve 2018, 2021 dhe 2024, paraqet një rrezik të mundshëm për sigurinë kombëtare të Kosovës dhe është i dyshuar për veprimtari që cënojnë rendin kushtetues.
“Është e pamundur të kërkojmë mbrojtje të rendit kushtetues nga persona që janë identifikuar si kërcënim për këtë rend,” tha Osmani në një deklaratë për mediat lokale, duke argumentuar se tërheqja e kërkesës ishte e domosdoshme.
Presidentja theksoi se gjyqtari Llaban nuk është emëruar nga ajo, pasi mandati i tij është nga viti 2018, dhe theksoi se shkarkimi i një anëtari të Kushtetueses mund të bëhet vetëm me vendim të dy të tretave të gjyqtarëve të saj, duke e bërë këtë proces jashtë ndikimit të Presidencës pa një iniciativë zyrtare nga vetë gjykata.
Në këtë situatë, Osmani kërkoi kujdes të shtuar në ruajtjen e integritetit të institucioneve kushtetuese dhe sigurinë e vendit, duke nënvizuar se çështjet e ndjeshme nuk duhet të trajtohen nga persona për të cilët ekzistojnë dyshime të mëdha lidhur me rrezikun ndaj rendit kushtetues.
Kujtojmë se presidentja Osmani më 22 korrik kishte depozituar në Kushtetuese një kërkesë për interpretim lidhur me pasojat ligjore në rast se Kuvendi i ri nuk konstituohet brenda afatit ligjor prej 30 ditësh.
Afati i konstituimit përfundoi më 26 korrik, ndërsa Kushtetuesja vendosi një masë të përkohshme që ndalon deputetët të kryejnë veprime për dy javë, deri më 8 gusht, duke pritur një sqarim të mëtejshëm nga gjykata.
Aktualisht, Kushtetuesja po shqyrton kërkesat e Partisë Demokratike të Kosovës dhe Lidhjes Demokratike të Kosovës për këtë çështje.
Presidentja Osmani në konferencën e fundit për media u shpreh se vendimi i gjykatës duhet pritur, ndërsa nxit deputetët që, nëse pas vendimit mbeten paqartësi, të kërkojnë sqarime shtesë.
