Ka dështuar për herë të 15-të përpjekja për konstituimin e Kuvendit të Kosovës. Si në seancat e mëparshme, edhe këtë herë Lëvizja Vetëvendosje kërkoi që zgjedhja e kryetarit të Kuvendit të bëhej me votim të fshehtë në vend të atij të hapur.
Megjithatë, për shkak të mungesës së votave të mjaftueshme, nuk u arrit të formohet komisioni që do të mbikëqyrte këtë procedurë.
Propozimin e mbështetën 56 deputetë, ndërsa një votë ishte kundër dhe nuk pati asnjë abstenim. Seanca e radhës është thirrur për ditën e enjte, në orën 10:30.
Ndërkohë që Kushtetuta nuk e përcakton një afat të caktuar për konstituimin e Kuvendit pas certifikimit të rezultateve apo betimit të deputetëve, Rregullorja e re e Kuvendit parashikon se ndërprerjet në seancën konstituive nuk duhet të zgjasin më shumë se 48 orë.
Pa konstituimin e Kuvendit, nuk mund të fillojë afati për formimin e Qeverisë së re. Vetëm pasi të zgjidhen kryetari dhe nënkryetarët e Kuvendit, Presidentja e Kosovës mund të mandatojë kandidatin për kryeministër, në konsultim me partinë që ka shumicën e deputetëve aktualisht Lëvizja Vetëvendosje.
Mandatari ka deri në 15 ditë nga emërimi për të paraqitur përbërjen e Qeverisë dhe për të kërkuar votëbesimin nga Kuvendi, i cili duhet të sigurojë të paktën 61 vota për të miratuar ekzekutivin e ri.
