Fatmir Hoxha, mësues në shkollën “Sali Halili” në fshatin Rrajcë të Librazhdit, është shkarkuar menjëherë nga detyra dhe është vënë në pranga, pas akuzave të rënda për ngacmim seksual ndaj dy nxënëseve të mitura.
Vendimi për largimin e tij nga sistemi arsimor u mor pas verifikimeve të kryera nga drejtoria e shkollës dhe shërbimi psiko-social, si dhe pas hetimeve të nisura nga Agjencia Kombëtare e Arsimit Parauniversitar.
Në një deklaratë zyrtare, AKAP njoftoi se rasti është referuar menjëherë pranë Policisë së Shtetit dhe se janë marrë masat e para për të garantuar mbrojtjen dhe mirëqenien e fëmijëve në institucionin arsimor.
Sipas burimeve zyrtare, mësuesi 55-vjeçar ishte denoncuar nga dy vajza, të moshës 13 dhe 14 vjeç, të cilat e akuzuan për ngacmime seksuale të përsëritura dhe përndjekje. Menjëherë pas denoncimit, policia e Librazhdit nisi hetimet dhe ndaloi Hoxhën në aeroportin e Rinasit, në momentin kur ai po përpiqej të largohej jashtë vendit.
Autoritetet kanë sekuestruar prova që mbështesin akuzat, ndërsa hetimet janë në vijim për të dokumentuar plotësisht dinamikën e ngjarjes. Policia dhe institucionet arsimore kanë theksuar angazhimin për të garantuar sigurinë e të miturve dhe për të ndëshkuar çdo formë abuzimi në shkolla.
Rasti ka shkaktuar reagime të forta në komunitetin lokal, ndërsa pritet që ndaj Hoxhës të ngrihen zyrtarisht akuza penale për veprat që rëndojnë mbi të.
