Pas denoncimit në polici të rastit të ngacmimit seksual të së miturës nga një 25- vjeçare, mësohet se policia ka arrestuar personin e gabuar.
Lajmi u bë i ditur nga vetë 25 vjeçarja e cila rrëfeu në emisionin me “Zemër të Hapur” përfshirjen në këtë histori të pazakontë si edhe çfarë ndodhi në orët kur ajo lëvizte me pranga në duar sa në një komisariat në tjetrin. Sipas saj, policia ishte sjell keq dhe se nuk i kishte dhënë asnjë informacion.
“Nuk isha e informuar. Pyeta për çfarë isha e akuzuar por nuk më dha njeri informacion. Më vunë prangat më morën edhe telefonin. Mbajtën të izoluar dhe një shokun dhe shoqen time që më shoqëruan. Qëndrova nga ora 8 deri ne 12:30 të natës në komisariatin 1 me pranga në duar. Kisha uri kërkova ushqim por nuk më dhanë”, tregon e reja.
Sa i përket momentit të ballafaqimit me prindërit e të miturës së ngacmuar seksualisht, e reja tregon se pas disa orësh në burg u kuptua se nuk ishte ajo personi që po kërkonin, pavarësisht se gjeneralitetet korrespondonin.
“Kur u ballafaqova me të, e ëma tha nuk është kjo vajza dhe aty ndërruan qëndrim ndaj meje. Në polici kërkoheshin dhe 3 vajza të tjera që kishin identitetin tim.”, shprehet më tej e reja.
Kujtojmë se rasti ka të bëjë me ngjarjen e rëndë të disa ditëve më parë, ku një e mitur ngacmohet seksualisht dhe shantazhohet nga një vajzë të moshës 25 vjeçare.
