Ditën e sotme është zhvilluar funerali i ikonës së kinematografisë shqiptare, Rikard Ljarja.
Ai u nda nga jeta mbrëmjen e djeshme, pas betejës së gjatë me një sëmundje të rëndë.
Familjarët e tij, çuan në vend amanetin e aktorit, i cili kishte kërkuar që të varrosej në vendlindjen e tij në Shkodër.
Numri i personave që e përcollën për në banesën e fundit ishte i vogël, për shkak të pandemisë.
Gjatë funeralit, u vunë re disa detaje mjaft shqetësuese, pasi të pranishmit nuk respektuan masat ndaj COVID-19, shkruan “Iconstyle”.
Njëri prej personave që ndodhej aty, përqafoi dhe puthi aktorin Robert Ndrenika, pa marrë parasysh fare udhëzimet për parandalimin e COVID-19.
Jo vetëm kjo, por gazetarja e “News24”, i afrohet Roza dhe Dhimitër Anagnostit për t’i marrë një prononcim, ndërsa nuk kishte as maska e as doreza, ndërsa nuk respektoi as distancën, duke i folur pothuajse “fytyrë më fytyrë”.
Gjithashtu disa prej të pranishmëve, nuk kishin as doreza e as maska mbrojtëse dhe qëndronin pranë njëri-tjetrit duke biseduar.
Po ashtu personat të cilët mbanin arkivolin, ishin të papajisur me maska dhe doreza mbrojtëse.
Që prej fillimit të epidemisë, funeralët kanë qenë vatra të përhapjes së infeksionit.
Kujtojmë këtu se dy raste, një në Shkodër dhe një në Has, kanë sjellë përhapjen e koronavirusit në këto dy qytete.
