Vazhdon një nga skemat e bashkisë së Tiranës këto vitet e fundit duke iu hequr fillimisht statusin monumenteve të kulturës dhe më pas duke i lënë thjesht pallate.
Në këtë mënyrë ato mund të jenë shumë lehtë “viktima” të shembjes nga ana e bashkisë së Tiranës. Kujtojmë që para disa ditësh, me datë 7 janar u shemb një tjetër vilë historike në Tiranë.
Banesa tip vilë dy katëshe u shpall në vitin 2015 “Monument Kulture Kategoria e Dytë”, me kodin II-229 por e humbi këtë status tre vite më pas.
Paradoksal është fakti që urdhri i shembjes së vilës erdhi nga i njëjti institucion i cili 3 vite më parë kishte dhënë urdhrin e mbrojtjes.
Kujtojmë që IKTK, DRKK dhe Ministria e Kulturës janë tre institucionet përgjegjëse për ruajtjen dhe mirëmbajtjen e trashëgimisë kulturore në Shqipëri.
Shembja e kësaj vile e shpallur në vitin 2015, “Monument Kulture Kategoria e Dytë”, e çon në 18 numrin e godinave Monument Kulture të shembura pesë vitet e fundit.
Kjo është një shifër alarmante për institucionet përgjegjëse, veçanërisht për Minsitrinë e Kulturës në Shqipëri.
Për 45 godina/vila Monument Kulture të marra në studim në Tiranë kemi 36 urdhra për heqje të statusit, veprim që ka çuar në shembjen e 18 vilave/godinave historike, ku 17 prej tyre janë zëvendësuar me pallate, Sipas investigimit të kryer nga “Citizens Channel”.
Njëkohësisht, zonat historike të Tiranës janë kthyer në kantiere ndërtimi. Prej vitit 2015, numri i lejeve të ndërtimit në kryeqytet është 1768. Viti 2016 shënon fillimin e rritjes së vrullshme të ndërtimit, që kulmon me 388 leje në vitin 2018, ndërsa për çdo vit numri i lejeve nuk ka rënë nën 250, shifër 6 herë më e lartë se ajo e vitit 2012.
