Më herët ditën e sotme, Ministria e Shëndetësisë njoftoi se gjatë 24 orëve të fundit janë regjistruar 14 raste të reja, 20 më pak se dje, duke e çuar në total numrin e të prekurve në 726 në vendin tonë.
Harta e të prekurve nga Covid-19 zgjerohet në Krujë me 9 raste , Tiranë me 4 raste dhe Shkodër 1 rast, teksa së fundmi janë zbardhur edhe detaje rreth rasteve të reja pozitive me koronavirus.
Mësohet se mes të prekurve është edhe një mjek i Sanatoriumit që u transferua prej disa javësh në Elbasan.
Mjeku i prekur është me inicialet P.M. dhe i përket stafit të dispancerisë që po përkujdeset për të sëmurët me pneumoni në spitalin e Elbasanit, pas transformimit të “Shefqet Ndroqi” në Covid2, raporton Shqiptarja.com.
Mjekët e Tiranës kishin mbi 3 javë që punonin në Elbasan dhe nuk kishin kontakt me kolegët e sëmurë të Tiranës dhe ende nuk dihet si është infektuar mjeku.
Mes rasteve të reja në Tiranë është edhe një i dënuar në burgun 313-t, duke e çuar në 19 numrin e të infektuarve në total në këtë vatër.
Po ashtu, mësohet se i prekuri në Shkodër ndodhet në Urgjencën e spitalit të Shkodrës dhe pritet që hetimi epidemiologjik të zbulojë se ku është infektuar.
Sa i përket 9 rasteve që kanë rezultuar pozitivë në Krujë, mësohet se janë punonjës të fasonerive dhe kontakte të tyre, nga të cilët 6 janë gra të moshës nga 33-66 vjeçe dhe 3 janë burra.
Aktualisht në vendin tonë 288 janë persona aktivë me Covid-19 duke vijuar që numri i të shëruarve të jetë më i lartë se i të infektuarve.
