Kryeministri Edi Rama prej ditësh ndodhet në Gjermani ku po zhvillohet Konferenca e Sigurisë në Mynih.
Ditën e sotme, përmes një statusi në Facebook ai ka ndarë një lajm të mirë, pasi shprehet se në Konferencën e Mynihut ka biseduar me Ministrin Federal të Transporteve lidhur me njohjen e pasaportave shqiptare në Gjermani.
Sipas Ramës, aprovimi i shumëpritur i njohjes së patentave shqiptare të drejtimit, kalon përmes të 16 parlamenteve të landeve të Gjermanisë dhe kjo do të kërkojë pak kohë, por ndërkohë çdo aprovim bën që në landin përkatës njohja të hyjë në fuqi menjëherë.
Kujtojmë që Shqipëria prej vitit 2018 kërkesën për një marrëveshje për njohjen e ndërsjellë të lejeve të drejtimit të automjetit, ndërsa në fillim të këtij viti Greqia miratoi njohjen e lejeve të drejtimit të marra në Shqipëri.
Statusi i plotë:
Një lajm i mirë për miqtë e kësaj faqeje që presin njohjen e patentave të drejtimit të makinave të tyre në Gjermani
Në Konferencën e Sigurisë në Mynih, bisedova edhe me Ministrin Federal të Transporteve, i cili më tha, citoj, “Misioni ynë teknik në Tiranë është befasuar nga transformimet që keni kryer në Drejtorinë e Transportit Rrugor, përmes digjitalizimit të shërbimeve! Zgjidhjet e reja digjitale që keni realizuar janë origjinale dhe bindëse për t’i përcjellë Qeverisë Federale një opinion pozitiv”
Aprovimi i shumëpritur i njohjes së patentave shqiptare të drejtimit, kalon përmes të 16 parlamenteve të landeve të Republikës Federale të Gjermanisë dhe kjo do të kërkojë pak kohë, por ndërkohë çdo aprovim bën që në landin përkatës njohja të hyjë në fuqi menjëherë. Pak durim tanimë, se provimin e kemi kaluar me sukses dhe ky është një fakt që na inkurajon shumë për vazhdimin e #RevolucionitDigjital2020
Një bravo të madhe ekipit drejtues të DPSHTRRSH që po e transformon çdo ditë atë strukturë nga një vatër korrupsioni legjendar, në një mekanizëm shtetëror në shërbim të qytetarëve.
