Prokuroria e Posaçme ka përfunduar hetimet dhe ka dërguar për gjykim dosjen “Metamorfoza”, ku përfshihen biznesmenii Pëllumb Gjoka dhe disa anëtarë të tjerë të grupit kriminal. Grupi përfshin Behar Brajoviq (Bajri), Edmond Preka, Astmer Bilali, Ardrit Hasanbegaj, si dhe dy ish-zyrtarë të lartë, Oltion Bistri nga policia dhe Xhevahir Lita, ish-prokuror i Kukësit.
Akuzat ndaj tyre përfshijnë një vrasje, pesë tentativa të tjera për vrasje, si dhe vepra të korrupsionit. Gjithashtu, akuzohen se kishin lidhje të ngushta me grupet kriminale dhe merrnin ryshfete për të mbrojtur aktivitetet kriminale.
Hetimet nisën në vitin 2019 pasi u zbuluan komunikime mes anëtarëve të grupit nëpërmjet rrjeteve të koduara si Enchro Chat dhe Sky, duke përfshirë plane për vrasje për shkak të hakmarrjes dhe konflikteve të brendshme. Në këto mesazhe, biznesmeni Pëllumb Gjoka kishte kërkuar nga Behar Bajri të vriste Klenthi Musabelliu, duke ofruar 120 mijë euro për këtë akt. Përkundër planeve, disa prej vrasjeve të planifikuara nuk u realizuan.
