Mëngjesin e sotëm presidenti Ilir Meta ka njoftuar në rrjetin social Facebook se do të dalë në një konferencë për shtyp në orën 11:00.
Tema për të cilën do të flasë, sipas Presidencës, është “votimet socialiste të 30 qershorit”.
Ai madje ka publikuar edhe një video për shqiptarët, por edhe duke ironizuar kryeministrin Edi Rama.
Në videon e publikuar nga Meta është Enver Hoxha dhe në krah të tij Spiro Koleka e madje edhe Kim Jong Un, të cilët i gëzohen fitores së zgjedhjeve.
Përbri videos, Meta shkruan:
“Mirëmëngjes të dashur miq! Forca numëruesve, si një trup i bashkuar drejt tejkalimeve të reja! Nga fitorja në fitorje! Destinacioni dihet. Kalofshi të gjithë një ditë të bukur sot!”
Mesazhi i Presidentit ka ardhur një ditë pas rezultateve, ku Partia Socialiste në mënyrë aspak befasuese fitoi në të gjitha bashkitë e vendit.
Veç kandidimit pa rivalë të të zgjedhurve të PS, mospërputhja e numrit të votuesve me të fletëve të votimit në kuti ka arritur të pasqyrohet deri edhe nga KQZ-ja, institucioni që pritet ta certifikojë këtë votim.
