Një tjetër seancë gjyqësore që nuk u mbajt. Përballja mes deputetes së PD-së, Albana Vokshi dhe sipërmarrëses Vilma Nushi u shty me kërkesë të prokurorit, pavarësisht se Vokshi ishte e gatshme të paraqiste dokumente që, sipas saj, faktojnë abuzimet me koncesionin e check-up-it.
Sipas deputetes, për një analizë që kushton 7 mijë lekë të vjetra, shteti i paguan kompanisë së Vilma Nushit plot 18 mijë lekë – një faturë që rëndon mbi taksapaguesit shqiptarë. Nga 3.9 milion analiza të kryera, Nushi ka përfituar mbi 4.3 miliard lekë. Jo vetëm kaq: 20 laboratorët që duhej të ndërtoheshin sipas kontratës, jo vetëm që nuk janë ngritur, por disa prej tyre janë nënkontraktuar ose ndërtuar në prona private. Shtesa të padrejta, analiza fiktive, laboratorë fantazmë – ky është realiteti i një prej koncesioneve më të denoncuara në shëndetësinë shqiptare.
Por kjo nuk është histori e izoluar. Vilma Nushi është vetëm njëra anë e medaljes. Në krahun tjetër qëndron Klodian Allajbeu, një tjetër emër që ka ndërtuar një perandori të tërë mbi shpinën e sistemit shëndetësor publik. Përmes koncesioneve të hemodializës, sterilizimit dhe laboratorëve – të gjitha të dhëna përmes procedurash të kontestuara dhe me lidhje të drejtpërdrejta me pushtetin – Allajbeu ka përfituar qindra milionë euro.
Nga pagesat për analiza të pakryera te dhënia e tokave me dokumente të dyshimta, nga tenderat e stërpërsëritur te lidhjet me zyrtarë të lartë – skemat janë të njëjta. Emrat ndryshojnë, por modeli mbetet: kontrata të fryra, abuzim me fondet publike dhe mbrojtje politike. Vilma Nushi dhe Klodian Allajbeu janë dy figurat simbol të këtij sistemi të kalbur, që ka shndërruar shëndetësinë në një industri fitimi për pak duar, ndërsa qytetari endet mes mungesës së barnave dhe aparaturave.
Drejtësia? Po vonon. Dosjet janë në SPAK, denoncimet janë bërë, hetimet janë hapur, por asgjë nuk lëviz. Ata që vodhën miliona nga sëmundjet e shqiptarëve janë ende të paprekur.
Shëndetësia në Shqipëri është kthyer në një fushë gjahu, ku qytetari paguan me taksa dhe me jetë, ndërsa pak të përzgjedhur bëjnë biznes me analizat, operacionet dhe barnat. Dhe kjo “masakër” vijon, me firmë, me vulë dhe me heshtje.
