Një sfidë e jashtëzakonshme që për shumëkënd do të dukej e pamundur, është bërë realitet nga Seb Ponari, shqiptari me origjinë nga Tropoja, i cili prej vitesh jeton në Angli.
Ai ka përshkuar 2750 kilometra në këmbë, nga Cambridge deri në Tropojë, përmes 9 shtetesh, brenda 40 ditësh, një udhëtim fizik e emocional që kulmon me përkujtimin e të atit të ndjerë.
Në momentin kur Sebi kaloi kufirin në pikën doganore të Hanit të Hotit, emocionet e morën përpara.
Në një ceremoni të thjeshtë mikpritjeje, ai shpërtheu në lot, kishte mbërritur më në fund në tokën shqiptare, pas një rruge që kërkonte jo vetëm fuqi fizike, por edhe forcë mendore të jashtëzakonshme.
Seb rrëfen se gjithçka nisi krejt rastësisht: “Karriera e vrapit ka filluar para dy vitesh e gjysmë. E fillova një mëngjes, u bëra me nerva me trajnerin, gjithmonë e kam pasur merak barkun rrafsh si 15 vjeç. Vrapova te një punë që e kisha 60 km larg. U mundova me vrapuar, se pas 50 km u dorëzova. Aty më kapi inati. Por edhe vrapimi më pëlqen se të bën me reflektuar dhe nga aty mu bë si pasion.”
Ideja për të ardhur në Tropojë me vrap u lind fillimisht si një mendim i largët, por këtë vit u kthye në vendim përfundimtar.
Sebi tregon: “Pas 6 muajsh, i bëra një pyetje vetes se si të shkojë në Tropojë me vrap. Por ngeli si ide. Edhe këtë vit, mu rikujtua prapë. Thashë shumë kam folur, por s’kam bërë asnjë gjë. Mbi të gjitha thashë meqë babi bën këtë vit 10 vjetorin që ka ndërruar jetë dhe do t’ia dedikoj atij. Do të shkoj nga shtëpia ime te e babait.”
Për Sebin, kjo nuk ishte vetëm një sfidë fizike, por një rrugëtim i thellë shpirtëror përballë betejave personale me veten dhe shëndetin mendor “Sepse kam vuajtur vetë dhe e vuaj. Por nuk e lë me më bllokuar si më përpara. Vrapi ka qenë faktor kryesor për mua për të përmirësuar kualitetin e jetës time. Hera e fundit që kam qenë me mendime të tepërta ishte sot. Është e pabesueshme të vraposh 2600 km dhe të ndihesh pa vlerë.”
Seb Ponari pritet të përmbyllë sfidën ditën e nesërme, në një moment simbolik që përkon me përkujtimin e 10-vjetorit të ndarjes nga jeta të babait të tij. Vrapi do të mbyllet pranë varrit të të atit, në Tropojë.
Por udhëtimi nuk përfundon aty. Sebi ka vendosur ta ndajë në dy etapa:
“Unë këtë e kam ndarë në dy faza. Një projekti Tropoja, dhe do të ndaloj te babai i ndjerë. Më pas të nesërmen, do ta përfundoj në Ksamil, ku do të bëj disa ditë plazh.”
Një histori e jashtëzakonshme për vrapin, kujtimin, sfidën me veten dhe kthimin në rrënjë, Seb Ponari ka ecur dhe ka vrapuar jo vetëm mijëra kilometra në rrugët e Evropës, por edhe thellë brenda vetes.
