Nënkryetari i Parlamentit shqiptar nga radhët e opozitës, Agron Gjekmarkaj, zhvilloi një takim me Kryetarin e Parlamentit të Saksonisë, Mathias Rößler. Gjekmarkaj shprehu mirënjohjen për mbështetjen e vazhdueshme të Gjermanisë në rrugën e Shqipërisë drejt integrimit europian.
“Sot pata kënaqësinë të pres Kryetarin e Parlamentit të Saksonisë, Dr. Matthias Rößler, një personalitet i shquar i politikës gjermane dhe mbi të gjitha një mik i vyer i Shqipërisë,” tha Gjekmarkaj në postimin e tij.
Ai shtoi se ndajnë të njëjtat pikëpamje për integrimin europian të Shqipërisë si “e vetmja rrugë”. Ai falënderoi Gjermaninë për mbështetjen gjatë dekadave të tranzicionit dhe theksoi rëndësinë e CDU/CSU-së në veçanti për Partinë Demokratike.
“Opozita nuk duhet të shkojë në zgjedhje me gojën mbyllur, duart dhe këmbët e lidhura!” tha Gjekmarkaj, duke nënvizuar nevojën për një proces të drejtë gjyqësor.
Gjekmarkaj informoi Dr. Rößler për ndalimin e Sali Berishës duke e quajtur këtë “arrest politik të papranueshëm në kundërshtim me nenin 73 të Kushtetutës” dhe duke e vënë opozitën në kushte të pabarabarta në vitin elektoral. Ai gjithashtu përmendi çështjen gjyqësore për vulën dhe simbolet e Partisë Demokratike si pjesë e një “pengmarrjeje politike” që ndihmon drejtpërdrejt qeverinë e Edi Ramës.
Ai theksoi problemin e 125,000 dosjeve të papërfunduara që zgjasin deri në 25 vjet dhe ndikimin politik mbi drejtësinë në raport me opozitën. “Një vëmendje e shtuar e Gjermanisë mbi Shqipërinë mbetet e mirëpritur,” tha Gjekmarkaj, duke theksuar rëndësinë e kësaj për forcimin e demokracisë dhe integrimin në Europë.
