Heshtje. Një heshtje vrastare ka mbuluar qytetin e Tiranës. Aty ku para dy javësh jehonin katër akuza të rënda që kërkonin 35 vite burg për kryebashkiakun, sot sundon qetësia e varrit. Erion Veliaj, njeriu që SPAK-u e akuzon për korrupsion, pastrim parash dhe fshehje pasurie, jo vetëm që shëtit i lirë, por vazhdon të qeverisë sikur asgjë të mos ketë ndodhur.
Në çdo vend normal, një zyrtar me akuza kaq të rënda do ishte prapa hekurave. Në Tiranën e Veliajt, akuzat për korrupsion bëhen tym e avull pas një fluturimi të shpejtë drejt perëndimit.
Dhe çfarë fluturimi! Bileta e avionit zbulon të vërtetën e hidhur: E prerë në panik një ditë pas komunikimit të akuzave, 3,395 euro për një vend ‘Business’ të minutës së fundit, Washington në vend të New York se nuk kishte vend tjetër. Kjo nuk është ikje pune – është arrati e mirëorganizuar.
Kronologjia është dëshmi e planit: Më 26 dhjetor SPAK-u e merr në pyetje, më 27 pret biletën emergjente, më 28 fluturon për në Amerikë. Dhe papritur, si me magji, mediat “harrojnë” katër akuzat që do ta çonin në burg.
Mesa duket, një vizitë e shpejtë te Alex Soros – njeriu që kontrollon prapaskenën e “Open Balkan” dhe që rri si hije pas Ramës – mjafton për të shuar çdo zjarr. Nga skandali i 5D te inceneratori që gëlltiti miliona pa u ndërtuar kurrë, nga tenderat me çmime marramendëse te shembja e Teatrit, te kullat që mbinë si kërpudha helmuese – të gjitha “harrohen” pas një udhëtimi të shpejtë.
SPAK-u hesht. Mediat heshtin. Institucionet heshtin. Të gjithë bëhen pjesë e një komploti heshtjeje që po varros skandalin më të madh të korrupsionit në historinë e Tiranës.
Ndërkohë koloneli vazhdon lojën, më i sigurt se kurrë në pandëshkueshmërinë e tij. Kush do ta prekë kur pas tij qëndron gjenerali që e quan hetimin “çorbë derrash”? Kush do të flasë kur heshtja shpërblehet dhe e vërteta dënohet?
Por pyetja që duhet të trondisë çdo ndërgjegje është kjo: Si mundet që një kryebashkiak me katër akuza që kërkojnë 35 vite burg lihet të vazhdojë të qeverisë? Si mundet që institucionet zgjedhin të heshtin përballë provave që bërtasin?
Përgjigjja është e thjeshtë dhe e tmerrshme njëkohësisht: Veliaj duhet mbrojtur që të mos flasë. Sepse nëse flet koloneli, rrëzohet i gjithë sistemi. Ndaj heshtja bëhet më e shtrenjtë se ari, më e fortë se ligji, më e rëndësishme se drejtësia.
Sa kohë mund të mbahet peng një qytet nga heshtja? Sa gjatë mund të mbulohet një korrupsion që ka tejkaluar çdo limit të imagjinatës? Ndërsa pyetjet kërkojnë përgjigje, heshtja vazhdon të vrasë, dita-ditës, çdo shpresë për drejtësi.
/gazetareforma.com
