Tre persona kanë përfunduar në pranga dhe dy të tjerë janë proceduar në gjendje të lirë, pasi akuzohen se kanë shitur bileta për ndeshjen “Shqipëri–Serbi” në rrjetet sociale, me çmime shumë herë më të larta se ato të vendosura zyrtarisht nga Federata Shqiptare e Futbollit.
Në kuadër të hetimeve të nisura nga policia, janë ndaluar shtetasit Ledion Metallari (34 vjeç), Arbi Topi (23 vjeç) dhe Ilir Lokaj (24 vjeç), ndërsa janë proceduar penalisht shtetasi E. Sh. (25 vjeç) dhe një 16-vjeçar.
Të dyshuarit kishin shfrytëzuar Instagramin për të tregtuar biletat me çmime që varionin nga 25 mijë deri në 50 mijë lekë të reja,shumë më lart se çmimi zyrtar.
Ndaj tyre rëndojnë akuzat për “Manipulim të tregut” dhe “Fshehje të të ardhurave”, ndërkohë që dosja është referuar për hetime të mëtejshme në Prokurorinë e Tiranës.
Autoritetet paralajmërojnë se do të vijojnë kontrollet për rastet e abuzimit me shitjen e biletave në ngjarje sportive.
