Ashtu siç ishte njoftuar, ditën e sotme Kuvendi po mban mocionin me debat me kryeministrin Edi Rama, për çështjen McGonigal, të kërkuar nga opozita.
Në sallën e seancës plenare ndodhet kreu i Partisë Demokratike, Sali Berisha dhe një grup i deputetëve të opozitës, cilëve u ka përfunduar afati i përjashtimit gjatë seancave të kaluara pas tensioneve dhe debateve të forta në Kuvend. Gjithashtu i pranishëm ështe edhe kryeministri Rama. Fillimisht seanca plenare ka nisur me një minutë heshtje në nder të viktimave të maskarës së djeshme nga Dan Hutra, i cili është cilësuar edhe si vrasësi serial.
24 orë do të jenë në dispozicion për të zhvilluar mocionin me debat me kryeministrin Edi Rama për çështjen McGonigal që ka sjellë akuza të forta nga ana e opozitës ndaj kryeministrit. Ndërkohë që deputeti i PD-së, Luçiano Boçi është shprehur kundër rendit të ditës në seancën plenare, ku ka kërkuar që përveç Mocionit me debat, të bëhet dhe një seancë pyetjesh me kryeministrin Edi Rama. Boçi tha se Rama ka frikë nga pyetjet. “Kam kërkuar seancë pyetjesh, interpelancë dhe nuk ka rregullore që i bashkon të treja në një. Kur kanë të njëjtën temë pse harruat që të thonit se kemi harruar të bënim dhe komisionin hetimor. Dhe Komisioni Hetimor dhe seanca e pyetjeve, është ndryshe. Ai zotëria aty lart ka frikë nga pyetjet”, tha Boçi.
