Qeveria vendosi në mbledhjen e datës 13 dhjetor, që zyrat e rivlerësimit të gjyqtarëve të kalojnë nën administrim të SPAK dhe Ministrisë së Drejtësisë, pasi nga 1 janari 2025, kompetencat e Komisionerëve Publikë do t’i kalojnë kryeprokurorit të Posaçëm, Altin Dumani.
“Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e Kryeministrit, Këshilli i Ministrave vendosi: 1. Në titullin e vendimit nr.518, datë 20.9.2017, të Këshillit të Ministrave, “Për kalimin në përgjegjësi administrimi të Ministrisë së Drejtësisë të një pjese të godinës, ku ushtron veprimtarinë Kontrolli i Lartë i Shtetit, për Kolegjin e Posaçëm të Apelimit dhe Komisionerëve Publikë, institucione të rivlerësimit të gjyqtarëve dhe prokurorëve në Republikën e Shqipërisë, i parashikuar nga ligji nr.84/2016”, të ndryshuar, dhe kudo në përmbajtje të këtij vendimi, fjalët “… Komisionerëve Publikë, institucione të rivlerësimit të gjyqtarëve dhe prokurorëve në Republikën e Shqipërisë, i parashikuar nga ligji nr.84/2016” zëvendësohen me “… Prokurorinë e Posaçme kundër Korrupsionit dhe Krimit të Organizuar …”, thuhet në VKM.
Me mbarimin e mandatit të komisionerëve publikë në fund të këtij viti, Prokuroria e Posaçme do të marrë përsipër çështjet e apeluara në KPA. Mandati i vetingut në shkallën e dytë ka si afat deri në qershor 2026. Gjatë procesit të kontrollit në shkallën e parë, u shqyrtuan 805 funksionarë, prej të cilëve 268 nuk u konfirmuan në detyrë, ndërsa rreth 100 u dorëhoqën. Aktualisht, 42 gjyqtarë dhe prokurorë janë në apel në KPA, dhe 130 të tjerë kanë bërë padi në Gjykatën e Strasburgut.
Kreu i SPAK, Altin Dumani, ka shprehur shqetësimin për gjyqtarët që kanë kaluar vetingun, por që mund të kryejnë akte korruptive. Ai theksoi se do të vazhdojnë të ushtrojnë ndjekjen penale ndaj subjekteve për të cilat kanë indicie për aktivitete korruptive.
