Sekretari i Përgjithshëm i Kombeve të Bashkuara Antonio Guterres tha se luftimet në Lindjen e Mesme duhet të ndalen menjëherë. Ai foli në një takim të Asamblesë së Përgjithshme të OKB, ndërsa nxiti Izraelin dhe Palestinezët të thërrisnin një armëpushim të menjëhershëm dhe u zotua të nisë një thirrje të plotë humanitare për fonde.
“Dhjetë ditët e kaluara kanë qenë dëshmi të një rritjeje të rrezikshme dhe të tmerrshme të dhunës vdekjeprurëse në territorin e okupuar Palestinez, veçanërisht në Gaza dhe në Izrael. Unë jam thellësisht i tronditur nga bombardimet e vazhdueshme ajrore dhe artileria nga forcat e mbrojtjes izraelite në Gaza,” tha Guterres në takimin e thirrur nga Organizata e Bashkëpunimit Islamik dhe Grupi Arab.
Ai tha se ishte i tmerruar nga raportet se nëntë anëtarë të një familje u vranë në kampin e refugjatëve al-Shati.
“Nëse ka një ferr në tokë, kjo është jeta e fëmijëve në Gaza”, theksoi Guterres.
Ai tha se ishte gjithashtu jashtëzakonisht i shqetësuar për shkatërrimin e zyrave të medias dhe vrasjen e një gazetari në Gaza, duke theksuar se gazetarët kanë të drejtë të kryejnë punën e tyre.
Sipas OKB, bombardimet kanë marrë jetën e 208 palestinezëve, përfshirë 60 fëmijë dhe plagosën mijëra të tjerë. Hedhja e raketave nga Hamas drejt Izraelit ka rezultuar në 12 viktima, përfshirë dy fëmijë, dhe qindra të plagosur.
Armiqësitë kanë shkaktuar dëme serioze në infrastrukturën në Gaza, duke përfshirë rrugët dhe linjat e energjisë elektrike, tha Guterres. Kalimet janë mbyllur dhe mungesa e energjisë po ndikon në furnizimin me ujë. Qindra shtëpi janë shkatërruar. Sulmet ajrore kanë dëmtuar gjithashtu disa spitale, të cilat ishin mbingarkuar tashmë nga pandemia e koronavirusit.
