Qeveria shqiptare ka në plan të japë së afërmi me koncesion nënshtetësinë shqiptare. Propozimi i pakërkuar ka mbërritur në zyrat e Agjencisë së Trajtimit të Koncesioneve (ATRAK) dhe pritet të zyrtarizohet shumë shpejt.
“Henley & Partners” është kompania e cila është kontaktuar edhe nga kryeministri Rama më 13 nëntor 2019 në Londër, e cila ka bërë studimin e fizibilitetit për këtë koncesion.
Koncesioni pretendon se do të sjellë investitorë të huaj të cilët pasi të blejnë pasaportën shqiptare do të investojnë në Shqipëri. Ai që do të blejë nënshtetësinë shqiptare do të përjashtohet nga taksat, do të përfitojë ulje të TVSH-së në 6 përqind .
Paratë e paguara për një pasaportë shqiptare do të ndahen ndërmjet qeverisë dhe kompanisë “Henley & Partners”, sipas një skeme të partneritetit publik privat.
“Henley & Partners” është në disa vende ku shitet nënshtetësia. Kështu në Maltë, ajo merr 4 përqind të shumës së paguar ndaj qeverisë dhe 4 përqind të çdo investimi të kryer nga personi që aplikon për pasaportën e vendit. Kjo kompani është edhe në Qipro, ku ka shpërthyer këto ditë skandali i shitjes së pasaportave të huajve. Në Qipro, kompania merr 13 përqind komision mbi shitjen e pasurive të huajve.
Kryeministri Rama, më 13 nëntor, ishte i ftuar në Konferencën Botërore për Nënshtetësinë në Londër, të organizuar nga kompania “Henley& Partners”.
Sipas njoftimit për shtyp të organizatorëve të takimit, Kryeministri do të deklaronte se “Shqipëria do të shesë nënshtetësinë përmes programit të dyshimtë dhe “të korruptuar” sipas fantazisë së mediave, cash për pasaportë, të hartuar nga kompania “Henley & Partners”.
Gjatë fjalës së tij Rama tha, “unë e di se ka shumë debate mbi këtë program”, dhe “ unë e di që kur të kthehem në Shqipëri, Komisioni Evropian do të më dërgojë një shenjë alarmi për këtë, por unë besoj fort se kjo është ajo çfarë ne duhet të bëjmë.”
Por përse kryeministri kërkon ta bëjë këtë gjë, megjithëse e pranon se kjo është e “rrezikshme”.
Arsyeja e pathëna është mungesa e investimeve të huaja në Shqipëri. Qeveria do të shfrytëzojë kulmin e pandemisë për ta kaluar këtë PPP kontraverse, kur edhe Komsioni Evropian nuk do të ketë kohë të merret me Ramën. Vera Jourova, Komisionerja e BE-së për Drejtësinë e ka deklaruar se “ Komisioni Evropian nuk do të mbështesë një skemë të përfitimit të pasaportës kundrejt pagesës”.
Thelbi i kësaj procedure është anashkalimi i procedurave të rregullta për marrjen e vizës dhe shmang vlerësimin e thellë të çdo individi mbi riskun për emigrim dhe siguri. Risku ka të bëjë me pastrimin e parave, financimin e terrorizmit, korrupsionin dhe ndërhyrjen e krimit të organizuar, evazionin fiskal.
Skandali i Qipros dhe sanksionet e BE-së
Ndërkaq, në një artikull të botuar dje, Revista “The Economist” parajmëronte një valë të zgjerimit të kësaj skeme për shitjen e nënshtetësisë nga qeveritë e dobëta, duke u justifikuar me rënien e ekonomisë gjatë pandemisë.
Artikulli i referohej një reportazhi investigativ të realizuar nga Al Jazira, ku duken politikanët qipriotë të filmuar në një operacion, me sa duket të gatshëm të shesin pasaportën e vendit të tyre një biznesmeni (fiktiv) kinez i cili, në historinë e kopertinës, ishte dënuar me shtatë vjet burg për pastrim parash, dhe kështu ishte i papërshtatshëm .
Megjithëse politikanët e përfshirë kanë protestuar në pafajësinë e tyre, Qipro ka pezulluar skemën e saj të “pasaportës së artë” nga 1 nëntori. Dhe në përgjigje të skandalit të fundit, Komisioni Evropian ka filluar veprimet ligjore për të hetuar skemën e Qipros dhe atë të ofruar nga Malta.
Sa kushton?
Në të gjithë botën, gati 100 vende ofrojnë një program “qëndrimi me investim”, duke përfshirë shumë nga vendet më të pasura të botës, të tilla si Amerika, Australia, Britania dhe Zelanda e Re. Por, vetëm një duzinë apo më shumë vende ofrojnë nënshtetësinë – duke përfshirë pesë shtete ishuj të Karaibeve (Antigua dhe Barbuda, Dominic, Grenada, St Kitts dhe Shën Lucia), një Paqësor (Vanuatu), Jordania, Turqia dhe, brenda Bashkimit Evropian, Austria, Bullgaria dhe Malta (si dhe, deri në fund të muajit, Qipro).
Shtetësia ose vendbanimi nga biznesi (CRBI) e ka origjinën e tij në një ligj të miratuar në 1984 në St Kitts, duke ofruar shtetësi për të huajt që bënë një investim “thelbësor”. Sa ndryshon thelbësisht nga vendi në vend. Në rastin e Qipros kërkohen të paktën 2 milion € (2.3 milion $) në investim, zakonisht në pronë. Malta kërkon një “dhurim” prej 650,000 € për një fond qeveritar, 150,000 € investuar në bono qeveritare dhe një blerje prone ose qira afatgjatë. Së shpejti do të shihni reklama që ofrojnë një zgjedhje të shtetësive të Karaibeve me 150 mijë dollarë.
Pop Shqipëria sa do ta shesë nënshtetësinë? Këtë do ta vendosë koncesioni PPP i kompanisë britanike.
/GazetaReforma.com/
