Një ngjarje tronditëse është zbuluar në Zelandën e Re, ku një grua 27-vjeçare është arrestuar pasi dyshohet se ka fshehur vajzën e saj dyvjeçare brenda një valixheje, në bagazhin e një autobusi që udhëtonte në veri të vendit.
Policia u njoftua të dielën rreth orës 12:50 pasdite, kur shoferi i autobusit, gjatë një ndalese në qytetin Kaiwaka, rreth 100 kilometra nga Auckland, vuri re se një valixhe në ndarjen e bagazheve po lëvizte në mënyrë të çuditshme. Ai vendosi të ndërhyjë dhe, pasi e hapi çantën, zbuloi brenda saj një vajzë të vogël.
“Vogëlushja dyvjeçare ishte tepër e nxehtë, por fatmirësisht pa dëmtime të dukshme fizike,” deklaroi policia. Hetimet paraprake tregojnë se fëmija ka qëndruar brenda valixhes për afro një orë.
Detektivi inspektor Simon Harrison konfirmoi se nëna është akuzuar për keqtrajtim dhe neglizhencë të një fëmije, ndërsa shtoi se vogëlushja ndodhet aktualisht në spital, ku po i nënshtrohet një ekzaminimi të detajuar mjekësor për të vlerësuar gjendjen e saj shëndetësore.
Ndërkohë, gruaja mbetet në paraburgim dhe pritet të dalë para gjykatës ditën e hënë. Policia dyshon se ajo është kthyer së fundmi nga Australia, por ende po hetohen rrethanat që çuan në këtë veprim të pazakontë e të rrezikshëm.
