Ish-zyrtari i lartë, Plarent Ndreca, i pandehur nga SPAK që nga data 25 tetor 2024, ka reaguar në një intervistë të publikuar në një media që ka lidhje me inceneratorët.
Ai ka shprehur shqetësimin për vonesat dhe problematikat në procedurat e hetimeve të SPAK, duke theksuar se nuk është informuar në kohën e duhur për çështjen e tij.
Ndrecës duket se i është ofruar mundësia për të ngritur disa nga pakënaqësitë e tij, ndërkohë që ai përballet me akuza për “shkelje të barazisë në tenderë” lidhur me devijimet ligjore gjatë tenderëve për ndërhyrjet në disa Komisariate të Policisë, kur ai mbante detyrën e Sekretarit të Përgjithshëm në Ministrinë e Brendshme.
Hetimi ndaj tij ka nisur pas kallëzimit nga Kontrolli i Lartë i Shtetit.
Ndreca, duke komentuar edhe për hetimin e tij, ka thënë se ka ngritur shqetësimet për shkeljen e afateve hetimore në Komisionin e Ligjeve, dhe ka dërguar shkresa të tjera për procesin që ai e konsideron të parregullt ligjor.
Ai thekson se është e nevojshme që institucionet e reja të drejtësisë të marrin kohën e duhur për të kryer punën e tyre, dhe duhet ruajtur një ekuilibër për të siguruar drejtësi.
Përsa i përket arrestimit të Erion Veliajt, Ndreca ka vazhduar me kritika ndaj SPAK, duke e cilësuar arrestimin e tij si një akt flagrant dhe një shembull të papranueshëm.
“Rasti i Erion Veliaj është flagrant. Të nxjerrësh një drejtues bashkie të votuar nga 160 mijë zgjedhës është flagrant. Është në detyrë. Prokurorët kanë detyrë të mos prishin prova. Nuk mund nga paaftësia për të menaxhuar procesin të heqësh nga detyra”, tha i pandehuri Ndreca.
Sipas Ndrecës, ky veprim është i papërgjegjshëm dhe prokurorët nuk kanë të drejtë të largojnë një kryetar bashkie të zgjedhur nga populli vetëm për paaftësinë në menaxhimin e procesit.
