Orli Shuka është sot një emër i njohur për publikun ndërkombëtar falë rolit të tij në serialin e suksesshëm të Netflix, “Gangs of London”. Por për një brez më të hershëm, ai është djali i aktorit dhe pedagogut të njohur të Akademisë së Arteve, Agim Shuka, i cili u nda nga jeta në mënyrë të papritur në vitin 1992.
I ftuar në emisionin “A Show” të Adi Krastës në Syri Tv, Shuka rrëfeu se ndihet me fat që ka ndjekur gjurmët e të atit. “Jam me fat që ndjek rrugën e babait. Është profesioni më i bukur në botë. Mundohem të shoh rrugëtimin e tij. E kam si hije”, tha ai.
Prej 27 vitesh jeton në Londër, ku ka ndërtuar karrierën e tij në kinemanë britanike, pa humbur përulësinë. “Jam me këmbë në tokë”, shtoi ai. Pas studimeve në Akademinë e Arteve në vitet 1995–1998, Orli Shuka pati rastin e parë të madh në vitin 2012 me filmin “Hyena”. Ai kujton se u përzgjodh rastësisht në rrugë për audicionet dhe pasi kaloi disa prova, regjisori e konfirmoi në rol. Filmi fitoi çmimin për kinematografinë më të mirë në Spanjë dhe i hapi dyert për projekte të tjera.
Në rrëfimin e tij, Shuka u ndal edhe te kujtimet për babain. “Kur ikën babai, të ikën dielli. Më la 16 vjeç. Ishte në kulmin e karrierës, 50 vjeç. Do të doja të më shihte sot, ndoshta do të bëhej krenar. Ka realizuar mbi 70 role në teatrin e Vlorës, ndërsa në vitin 1982 u bë pedagog i Akademisë së Arteve. Ishte autoritar, por unë e mbaj mend të qeshur”, tha aktori.
Sot, e gjithë familja e tij jeton në Londër. “Edhe motrën e mamin i kam aty, jetojmë afër njëri-tjetrit. Jam martuar me një aktore, jemi njohur në Akademinë e Arteve. ‘Aktore e kërkoi babai, aktore mori edhe i biri’, them me të qeshur”, tregoi ai. Orli është baba i dy vajzave, njëra prej të cilave studion për fizikë, ndërsa tjetra ka zgjedhur rrugën e aktrimit.
Shuka kujtoi edhe përvojën e tij në filmin “War Machine”, ku rolin kryesor e mbante Brad Pitt. “Vinte me katër sozi. Ai bënte vetëm pjesën ballore, pjesët e tjera i realizonin të tjerët. Ishte një përvojë e madhe, edhe në praninë e Angelina Jolie”, u shpreh ai.
Megjithatë, aktori nuk ka pranuar gjithmonë çdo ofertë. Ai tregoi se kishte refuzuar një rol që lidhej me të ashtuquajturën “Shtëpia e Verdhë” për shkak të temës mbi trafikun e organeve. “E refuzova, nuk mund ta bëja atë rol”, tha ai.
Përsa i përket projekteve të ardhshme, ai konfirmoi se pas tre sezoneve të suksesshme, “Gangs of London” do të rikthehet me një sezon të katërt vitin e ardhshëm. Ndërkohë, për shkak të fokusit të kinemasë te konflikti Rusi–Ukrainë, Shuka ka interpretuar disa role si rus. “Kam bërë katër role, tani do të bëj të pestin. Pas dy muajsh do të udhëtoj në Kore për një tjetër projekt”, zbuloi aktori shqiptar.
Nga Vlora në Akademinë e Arteve, nga kujtimet e babait te karriera ndërkombëtare, rrugëtimi i Orli Shukës mbetet një dëshmi e lidhjes së fortë mes trashëgimisë familjare dhe pasionit për aktrimin.
