SHKUP
Dy partitë me më shumë vota, ajo maqedonase LSM dhe ajo shqiptare BDI, konfirmojnë se po vazhdojnë takimet konstruktive të punës në nivelin e sekretarëve të përgjithshëm për të siguruar një qeveri të qëndrueshme me mandat 4 vjeçar.
Përmes një komunikate të përbashkët, partitë thonë se shpërndarja e përgjegjësive sipas departamenteve në koalicionin e ardhshëm është duke u zhvilluar dhe se ky është një proces në të cilin është bërë përparim i mirë e është arritur marrëveshje në parim, shkruajnë mediat në Maqedoninë e Veriut.
Partitë përsërisin se do të propozojnë drejtues të përshtatshëm të institucioneve që do të zbatojnë programin në mënyrë të suksesshme.
Ndërsa, palët kanë thënë se janë duke punuar intensivisht për të harmonizuar programin e qeverisë së radhës, duke u fokusuar në problemet ekonomike, tek drejtësia, barazia dhe tek integrimi.
Lideri i LSDM-së Zoran Zaev të enjten mori mandatin për formimin e qeverisë dhe të shumicës parlamentare.
Nëse Zaev nuk arrin të formojë qeverinë për 20 ditë, atëherë mandati për të krijuar qeverinë i kalon liderit të VMRO DPMNE-së Hristijan Mickovski.
