Të tjera detaje janë zbardhur pas atentatit të sotëm ndaj Ardian Çapjas në Elbasan.
Gazetarja Klodiana Lala ka raportuar ngjarjen nga Elbasani, e cila ka theksuar se bëhet fjalë për një atentat të mirëorganizuar.
Po ashtu Lala bëri të ditur dhe dinamikën se si rrodhi ngjarja, duke shtuar dhe faktin se pranë banesës së Ardian Çapjat nuk ka asnjë makinë policie.
Ardian Çapja është një personazhi i njohur për drejtësinë, ndaj të cilit është kryer atentati i tretë i mirëorganizuar.
Çapja është qëlluar me një snajper në shpatull.
Kur ishte paraqitur në spital, ai ka deklaruar se ishte rrëzuar në shtëpi. Por mjekët konstatuan se ishte qëlluar me armë.
Atentatorët janë larguar me automjet, në Fushë-Mbret.
Ndërsa Lala ka raportuar edhe një detaj tjetër të rëndësishëm duke konstatuar se lagja ku banojnë Çapjat është e rrethuar me kamera sigurie vendosur nga vetë familja.
“Kjo zonë është e monitoruar. Në çdo shtyllë elektrike, janë të vendosura kamera me rezolucion të lartë.
Kjo ka ndodhur pasi prej vitesh kjo familje ka qenë pjesë e sulmeve”, është shprehur gazetarja Lala.
Gazetarja tha ndër të tjera se familja Çapja ishte shprehur e indinjuar për punën e deritanishme të Policisë së Shtetit, ata madje edhe kanë hedhur akuza ndaj policisë duke thënë se punonjës me uniforma janë të përfshirë në atentatet e ndodhura ndaj tyre.
I plagosur ka ngelur edhe zjarrfikësi Dash Muhaxhiri, i cili ka tentuar të shuajë flakët tek makina e djegur e autorëve, por aty është përballur me shpërthimin e disa fishekëve.
Për fat të mirë, zjarrfikësi është në gjendje të mirë për jetën.
