Ditën e djeshme krerët e shteteve anëtare të Mini-Schengenit u mblodhën në një takim virtual për të disktuar mbi ecurinë e pandemisë së Covid-19 dhe bashkëpunimit mes shteteve.
Në këkë takim online morën pjesë, kryeministri Edi Rama, kryeministri i Maqedonisë së Veriut Zoran Zaev dhe presidenti i Serbisë, Aleksandar Vuçiç dhe kryeministrja e Serbisë, Ana Brnabiç si dhe ministrat e Shëndetësisë nga të tre vendet.
Gjatë këtij takimi u nënshkrua një Memorandum për bashkëpunimin gjatë kësaj periudhe dhe sipas kryeministrit Zaev ky Memorandumi vjen nga iniciativa për bashkëpunim të avancuar, që siç theksoi ai, është në përputhje të plotë me Procesin e Berlinit.
“Duke filluar që tani, punojmë në koordinim për sigurimin e vaksinës kundër COVID-19 për qytetarët tanë. Do të mbështetemi mes vete dhe do të ndihmohemi në momente të caktuara, nëse ndodh mbingarkesë e sistemeve shëndetësore në vendet tona”, tha mes tjerash Zaev.
Ai gjithashtu tha se hapen “korridore të gjelbërta” për kalim të qytetarëve dhe operatorëve ekonomikë, me qëllim të zbutjes së pasojave të pandemisë, duke shtuar se në tre vendet mund të kalohet pa test PCR. Memorandumi gjithashtu parasheh edhe shkëmbim të eksperiencave mjekësore.
“Nëse ndonjë qytetar i ndonjë vendi nënshkrues mbetet në territorin e një shteti tjetër dhe duhet të trajtohet në vendin në të cilin është hospitalizuar, atëherë shteti në të cilin trajtohet do t’i merr përsipër harxhimet e mjekimit”, tha Zaev.
Ai përshëndeti faktin që edhe Kosova do t’u bashkangjitet proceseve rajonale, ndërsa tha se shpreson që së shpejti këtë do ta bëjnë edhe Mali i Zi dhe Bosnje e Hercegovina.
Shqipëria dhe Serbia me marrëveshje për kalim të kufirit me letërnjoftim
Përveç Memorandumit për bashkëpunim në lidhje me COVID-19, sot Shqipëria dhe Serbia nënshkruan marrëveshje sipas së cilës shtetasit e dy vendeve mund të qarkullojnë vetëm me letërnjoftim.
Kryeministri shqiptar Edi Rama u shpreh i kënaqur që me këtë, Shqipëria ka nënshkruar marrëveshje me të gjitha shtetet e Ballkanit Perëndimor për kalim të kufijve me letërnjoftim.
“Besoj fuqishëm që kjo iniciativë do të rritet, do të na ndihmojë të gjithë ne që të njihemi më mirë kur janë në pyetje vështirësitë ditore të ekonomive tona, të sfidave sociale, ndërsa në të njëjtën kohë do ta bëjë shumë më të lehtë atmosferën për të gjetur zgjidhje për të mirën e popujve tanë si për të ardhmen, ashtu edhe për të kaluarën”, tha Rama.
