Paketa “Anti-KÇK” ka përfshirë edhe ish-kreun e bandës së Durrësit, Lulzim Berishën.
Zëdhënësja e OFL ( Operacioni Forca e Ligjit), bëri me dije se ka nisur një kërkesë me shkrim për deklarimin e pasurisë këtij subjekti.
Brenda 48 orëve Berisha duhet të deklarojë pasurinë dhe më pas dosja do t’i kalojë SPAK-ut.
Lulzim Berisha u arrestua më 6 prill të 2006-ës dhe ka qëndruar në burg 10 vjet e 8 muaj burg.
Fillimisht ai u dënua me burgim të përjetshëm, por pas një kalvari të gjatë proceses gjyqësore, ai la qelinë në 5 dhjetor të 2016-ës, kur i kishin mbetur edhe 5 vite burg.
Lulzim Berisha është një nga personazhet më famëkeq të botës së krimit.
Ai akuzohej për një sërë veprash penale, duke filluar nga vrasja, trrafik droge, trafik qëniesh njerëzore.
Berishës iu ul dënimi nga burgim i përjetshëm në 25 vite dhe më pas duke përfituar nga ulja e dënimit dhe aministitë, ai doli nga burgu.
Në vendimin e Gjykatës së Apelit, thuhej se subjekti kishte shlyer 18 vjet, 9 muaj e 22 ditë nga dënimi prej 25 vitesh.
Ndërkohë ai për 5 vite duhej të paraqitej në shërbimin e provës dhe nuk duhet të kryente vepra kriminale.
Kryebashkiaku i Durrësit, Vangjush Dako lëshoi një karakteristikë familjare për Berishën, për të vërtetuar se është i gatshëm për t’u riintegruar në shoqëri.
“Bashkia Durrës, duke vlerësuar gjendjen e kësaj familjeje, sjelljen e tyre në komunitet, si dhe mundësinë e lirimit të të dënuarit, garanton punësimin e të dënuarit Lulzim Berisha, në pamundësi për t’u punësuar në ndonjë subjekt privat,” citohej shkresa e ish-kryebashkiakut Vangjush Dako në vendimin e lirimit.
Gjykata e Apelit në vendimin për lirimin e Berishës mori parasysh edhe faktin se gjendja e tij psikologjike ishte rënduar së tepërmi, kishte shfaqur pendesë dhe kishte dy prindër të sëmurë rëndë, që jetojnë vetëm.
Gjithashtu brenda 48 orëve, duhet të deklarojë me shkrim pasurinë edhe Ardian Çapja i Elbasanit, i cili la qelinë vetëm pak muaj më parë.
Ai akuzohej për një sërë vrasjesh në qytetin e Elbasanit, por u la i lirë për mungesë provash.
