Përshkallëzimi i konfliktit mes Iranit në njërën anë dhe Izraelit bashkë me Shtetet e Bashkuara në anën tjetër po afrohet gjithnjë e më shumë drejt kufijve të Europës. Zhvillimet e fundit tregojnë se përplasja nuk mbetet më vetëm në Lindjen e Mesme, ndërsa në rrezikun potencial përfshihen edhe zona më të afërta me kontinentin europian.
Qipro është goditur disa herë me raketa nga regjimi i Teheranit, për shkak se në ishull ndodhet një bazë britanike që është përdorur edhe nga forcat amerikane në operacionet ushtarake në rajon.
Ndërkohë, këtë të mërkurë NATO ndërhyri për të neutralizuar një raketë që ishte nisur drejt Turqisë. Sipas informacioneve, projektili kishte kaluar më parë në hapësirën ajrore të Irakut dhe Sirisë përpara se të asgjësohej nga sistemet e mbrojtjes ajrore.
Në këtë klimë tensioni, pyetja që shtrohet është se sa larg mund të arrijnë realisht raketat iraniane.
Përmes një postimi në rrjetin social X, Ministria e Jashtme e Izraelit publikoi një hartë që tregon shtrirjen e mundshme të raketave balistike të Iranit dhe vendet që mund të jenë në rrezikun e tyre.
“Aftësia balistike e Iranit shtrihet përtej Lindjes së Mesme. Regjimi i Ajatollahëve iranianë po kërcënon paqen botërore”, thuhet në njoftimin e Ministrisë së Jashtme izraelite.
