Ish-missi Eria Ago, e dashura e Safet Bajrit, është vënë në pranga nga Departamenti i Krimeve të Rënda në Policinë e Shtetit me urdhër të SPAK. Arrestimi i saj erdhi pesë ditë pas kapjes së Safet Bajrit, teksa dyshohet për përfshirje të drejtpërdrejtë në vrasjen e Fatbardh Licit më 10 gusht 2018.
Ago, pronare e një butiku në rrugën “Myslym Shyri” në Tiranë, sipas SPAK ka luajtur rol aktiv në vrasje duke drejtuar një nga automjetet e përdorura në krim. Hetuesit dyshojnë se ajo ka ndihmuar në largimin nga vendngjarja të autorëve të dyshuar, Safet Bajrit dhe Astmer Bilalit.
Aktualisht e arrestuara mbahet në burgun e Pojskës në Pogradec, nën akuzat për krijimin e kushteve për kryerjen e vrasjes dhe përkrahje të autorëve të krimit.
Eria, e cila aktualisht mbahet në burgun e Pojskës në Pogradec, përballet me akuzat për krijimin e kushteve për kryerjen e vrasjes dhe përkrahje të autorit të krimit. SPAK ka marrë në pyetje të arrestuarën lidhur me ngjarjen.
Emri i saj nuk është i panjohur për drejtësinë shqiptare. Ajo është përmendur në përgjimet që çuan në arrestimin e Hermes Nikajt, i njohur si “Zogu i Tiranës” në vitin 2020. Në këto përgjime që zbuluan një rrjet prostitucioni ku përfshiheshin emra të njohur të showbizit shqiptar, ish-missi përflitej si kliente potenciale.
Më 21 shkurt, forcat RENEA arrestuan Safet Bajrin (Rustemi) me urdhër të SPAK, ndërsa u lëshuan urdhër-arreste edhe për Behar Bajrin dhe Astmer Bilalin, të cilët tashmë ndodheshin në burg për vepra të tjera penale.
Ata akuzohen për vrasje me paramendim në kuadër të një grupi të strukturuar kriminal, pjesëmarrje në grup të strukturuar kriminal dhe kryerje të veprave penale nga organizata kriminale.
53-vjeçari Fatbardh Lici, viktimë e kësaj ngjarjeje të rëndë, ishte pjesëtar i një familjeje të njohur në Shkodër. Ai ishte vëllai i Sokol dhe Mustafa Licit, xhaxhai i Ibrahim Licit dhe kunati i të ndjerit Lulzim Kulla, i njohur si “i forti i Shkodrës”. Ekzekutimi i tij ndodhi teksa pinte kafe në një lokal në lagjen Kiras, shumë pranë banesës së tij.
Vrasja e Licit dyshohet se erdhi si hakmarrje nga fisi Bajri, pas ekzekutimit të ish-policit Boran Bërçana. Më 15 korrik 2018, Bërçana u ekzekutua së bashku me bashkëshorten e tij, Silvi Ndoci, poshtë banesës që kishin marrë me qira.
Në makinë me ta ndodhej djali i tyre 3-vjeçar, i cili fatmirësisht shpëtoi pa lëndime. Ish-polici Bërçana dyshohej për lidhje me grupin Bajri dhe përfshirje në atentatin ndaj Lulzim Kullës në 2018, vrasje që mendohet se u krye nga fisi Lici.
Viti 2018 në Shkodër u karakterizua nga një valë vrasjesh, përfshirë ato të Lulzim Kullës, Arjan Ferracakut dhe Kujtim Ferracakut. Këto ngjarje u pasuan nga atentate të tjera në vitet në vijim, të cilat besohet se lidhen me konfliktin e përgjakshëm midis fiseve Lici, Bajri dhe Bilali, konflikt që vijon të tronditë qytetin verior.
