Nëse Covid-19 në vendin tonë nuk arriti të krijonte një marrëdhënie bashkëpunuese mes qeverisë dhe opozitës, duket se mazhoranca dhe Presidenti kanë rregulluar marrëdhëniet mes tyre.
Të paktën kështu kanë lënë të kuptohen deklaratat, ku presidenti Ilir Meta ka shprehur mbështetje për qeverinë në këtë situatë në të cilën ndodhemi, kurse kryeministri Rama e ka falenderuar për mbështetjen që ka treguar kreu i shtetit.
Kështu, i pyetur nga Eni Vasili në “Open” mbrëmjen e sotme nëse është në një stinë pranvere me qeverinë, Meta tha se pranvera e tij e vetme është në raport me Kushtetutën.
“Së pari, nuk kemi të bëjmë me një pranverë marrëdhëniesh pas një dimri marrëdhëniesh. Këto janë koincidenca tërësisht. Pranvera ime e vetme si President i Republikës është në raport me Kushtetutën. Jam gati të jetoj çdo stinë pranverore me ata që respektojnë Kushtetutën. Qeveria është në presione të forta, është vetë situata që imponon vendimmarrje jo të lehta, është momenti për ta mbështetur qeverinë, sikurse është momenti për të kuptuar se ruajtja e kushtetueshmërisë është vendimtare dhe kjo situatë nuk mund të keqpërdoret për veprime abuzive në të drejtat e qytetarëve tanë. Përballimi i pandemisë është objektiv i gjithë aktorëve. Qytetarët shqiptarë i janë përgjigjur me përgjegjësi kësaj situate. Është bazë e një suksesi.”- tha presidenti Meta.
Më tej, Meta foli edhe për ndryshimet në Kodin Penal dhe u shpreh i kënaqur që Kuvendi pranoi disa nga propozimet e tij, por shtoi se ende nuk i di detajet se si kanë votuar deputetët, e një qëndrim më të qartë do ta ketë kur bëhen publike ndryshime.
Ai u shpreh se ndryshimet tha se u bënë sepse kishte një mungesë ligjore, pasi situata ishte e re për Shqipërinë.
“Ka pasur një boshllëk në Kodin Penal për këtë situatë. Kjo është një situatë e panjohur për ne. Ne shpresojmë që kjo të zgjasë pak javë, por nuk e dimë sepse është një situatë e re për ne. Drafti i parë ka krijuar një reagim në opinionin publik, shoqërinë civile dhe media. Unë do të mbaj një qëndrim publik pasi të vijë drafti përfundimtar”, u shpreh ai.
