Para disa ditësh ish-presidenti i Shqipërisë Bujar Nishani humbi jetën tragjikisht.
Ish-kryetari i shtetit ndërroi jetë më 28 maj në një spital në Gjermani, ku ishte i shtruar prej një muaji. Ndërkohë që pas ardhjes në Shqipëri të trupi të tij të pajetë mbrëmjen e djeshme, në vend do të mbahen 2 ditë homazhe në nder të ish-kreut të shtetit. Po ashtu qeveria ka vendosur me anë të një vendimi se data 2 qershor do te jetë ditë zie kombëtare.
Gjithashtu, në njoftim thuhet edhe se shpenzimet e varrimit dhe të ceremonialit do të përballohen nga buxheti i miratuar për Kryeministrinë për vitin 2022.
Vendimi i plotë:
V E N D I M PËR SHPALLJEN DITË ZIE KOMBËTARE NË NDERIM TË TË NDJERIT, Z. BUJAR NISHANI, ISH-PRESIDENT, ISH-MINISTËR DHE ISH-DEPUTET
Në mbështetje të nenit 100 të Kushtetutës, të pikës 4, të nenit 4, të ligjit nr.8926, datë 22.7.2002, “Për formën dhe përmasat e flamurit kombëtar, përmbajtjen e himnit kombëtar, formën dhe përmasat e stemës së Republikës të Shqipërisë dhe mënyrën e përdorimit të tyre”, dhe në vijim të pikës 12, të kapitullit VI, të ceremonialit shtetëror të Republikës së Shqipërisë, miratuar me vendimin nr.420, datë 8.6.2016, të Këshillit të Ministrave, të ndryshuar, me propozimin e Zëvendëskryeministrit, Këshilli i Ministrave
V E N D O S I:
Shpalljen ditë zie kombëtare, ditën e enjte, datë 2.6.2022, në nderim të të ndjerit, z. Bujar Nishani, ish-President i Republikës së Shqipërisë, ish-ministër dhe ish-deputet.
Në të gjitha institucionet shtetërore dhe publike të ulet flamuri kombëtar në gjysmështizë.
Ceremonia e homazheve të organizohet ditën e enjte, datë 2.6.2022, nga ora 10:00 deri në orën 12:00, në mjediset e institucionit të Presidencës.
Shpenzimet e varrimit dhe të ceremonialit të përballohen nga buxheti i miratuar për Kryeministrinë për vitin 2022.
Ky vendim hyn në fuqi menjëherë.
