Ka një moment në takimet elektorale të Edi Ramës, kur maska e politikanit që “ka ardhur të dëgjojë hallet e popullit” bie menjëherë. Ky është çasti kur ndonjë qytetar guxon të flasë hapur për korrupsionin dhe ryshfetet që paguhen çdo ditë për shërbime që duhej të ishin falas.
Një skenë e tillë u përsërit këtë të hënë në Shkozë, gjatë një takimi që synonte të qetësonte banorët mbi fabrikën e re të armëve. Takimi po ecte mirë deri kur një qytetar përmendi hapur korrupsionin: “Sapo tenton të bësh një kotec pulash, vjen IMT, IKMT, policia bashkiake, policia e rendit dhe kërkojnë secili nga 5 mijë, 10 mijë apo 20 mijë euro.”
Në atë çast, kryeministri nuk buzëqeshi më. Me ton kërcënues dhe arrogant, ai iu drejtua qytetarit: “Nuk mund të flasësh në hava. Zotnia jote ka ndërtu pa leje këtu? Është turp i madh që e thua kështu! Ti je po aq fajtor sa ata që kërkojnë para.”
Në vend që ta trajtonte qytetarin si viktimë të sistemit, Rama e ktheu atë në fajtor dhe e ftoi ose të shkonte në polici ose të heshtte. Pas takimit, edhe ministri i brendshëm Ervin Hoxha i kërkoi qytetarit që të mos fliste më, duke e këshilluar ta linte këtë temë.
E vërteta është e qartë: korrupsioni nuk vjen rastësisht nga disa inspektorë në periferinë e Tiranës. Ai është pjesë e një mekanizmi më të madh që e mban sistemin në këmbë dhe që i ushqen fushatat elektorale.
Kush flet publikisht për këtë fenomen nuk merr zgjidhje, por kërcënime dhe intimidim nga ai që qëndron në krye dhe dëgjon popullin vetëm atëherë kur populli nuk i thotë të vërtetat e hidhura.
