Naftëtarët e Ballshit janë futur në ditën e 7-të të grevës së urisë, për 5 pagat e prapambetura.
Gjendja e tyre shëndetësore është e rënduar, por ata nuk kanë ndërmend të tërhiqen nga kauza e tyre.
Deri më tani, ata shprehen se kanë marrë vetëm premtime boshe nga përfaqësues të kompanisë.
Në mbështetje të tyre erdhën edhe 8 minatorë nga Bulqiza.
Një përfaqësues i tyre u bëri thirrje naftëtarëve që të bashkohen dhe të luftojnë për të drejtat e tyre.
‘Hallet i kemi të përbashkëta si ne në Bulqizë. Dy janë sektorët më të mëdhenj të vendin miniera në Bulqizë dhe nafta në Ballsh, ky është një hall i përbashkët. Kundër nesh janë pronarët, shteti, oligarkët dhe e vetmja mënyrë është që ne ta marrim situatën në dorë, të bashkohemi, t’i japim dorën njëri tjetrit se mbi të gjitha jemi këtu për të drejtat tona dhe jo për të drejtat e atyre. Bashkimi bën fuqinë. Minatorët ende se kanë marrë një status dhe ato vuajnë po ashtu si ju me shumë probleme shëndetësore. T’i japim dorë njëri tjetrit të bashkohemi dhe të krijojmë sindikata të reja, pasi ato që janë shohin thjeshtë interesat e tyre dhe se kanë mendjen te punëtorët’, tha përfaqësuesi i minatorëve të Bulqizës.
Gjithashtu gjatë orës 10:00, në qendër të qytetit të Ballshit është zhvilluar një tubim paqësor, ku ishin të pranishëm 800 punëtorët e rafinerisë, minatorët e Bulqizës, qyetarë dhe familjarët e grevistëve.
