Ramazan Rraja, nipi i deputetit të Partisë Socialiste, Rrahman Rraja është shpallur ditën e sotme në kërkim nga Policia e Lezhës, për ngjarjen e 13 nëntorit, ku tre persona hynë në një lokal të maskuar dhe të armatosur.
Por Rraja në një bisedë telefonike për “Ballkan Web” u shpreh se e konsideron ngjarjen të stisur, ndërsa kërkoi nga prokuroria dhe policia të nxjerrin qoftë edhe një provë të vetme. 28-vjeçari shtoi se aktualisht ai ndodhet në Dubai, vend në të cilin ka ndenjur që prej muajit gusht të këtij viti.
“Është një ngjarje e stisur nga policia e prokuroria. të më nxjerrin një fakt apo provë, dhe jam gati të paraqitem para drejtësisë, të marr dënimin maksimal. Aktualisht ndodhem në Dubai, jetoj këtu prej gushtit të këtij viti. Nuk jam arratisur nga Shqipëria, hyrje daljet e mia mund të verifikohen lirshëm. ”- thotë ai, ndërsa jep versionin e tij për ngjarjen.
“Natën e ngjarjes që flet policia, për të cilën më ka ngritur akuzë, kam qenë në shtëpinë time, kam video e foto për këtë, dhe prokuroria e policia e dinë shumë mirë, sepse më kanë thënë telefoni im është në përgjim. E kanë kollaj për ta zgjidhur këtë cështje.”- u shpreh Rraja.
Ndër të tjera Ramazan Rrahja apelon që xhaxhai i tij deputet, Rrahman Rraja, të mos lakohet sa herë përmendet emri i tij.
“Sa i takon, xhaxhait tim deputet dua që mos të përmendet emri i tij, nuk kam asnjë lidhje me të, asnjë lloj kontakti. Ai është i zgjedhur i popullit, nuk dua të përfshihet në këtë ngjarje.
Është një ngjarje e stisur, nga njerëz që policia e di shumë mirë. Nuk e kam idenë kush janë njerëzit në lokal, nuk kam qenë kurrë në atë fshat të Lezhës. Kam çuar avokatin tim në polici, të më japin qoftë edhe një provë të vetme, dhe jam i gatshëm të vi, i hipi avionit menjëherë dhe vi paraqitem para drejtësisë.
Dikush ka akses shumë të fortë te policia e Lezhës, kundrejt rryshfetit terorrizojnë familjen time. Një e dy më nxjerrin emrin në media. Policia e prokuroria të bëjnë punën e tyre, të keni një provë e fakt, dhe jo gojëdhënat, nga goret e Kurbinit. Nuk kam konflikt me njeri, lëviz i qetë”- përfundoi Ramazan Rraja, reagimin e tij.
