Kryeministri Edi Rama ka realizuar së fundmi një komunikim me qytetarët në Facebook, ku ka njoftuar se prej orës 17:30 të ditë së sotme të gjithë do të mbyllen në shëpi, njësoj si fundjavën e kaluar.
Ai tha se të gjithë do të jenë të izoluar, përveç atyre që kanë punë specifike.
“Fundjava do të jetë e bllokuar. E shtuna e diela, e bllokuar. Të gjithë në shtëpi. Përveç atyre që janë në punë. Jemi në situatë pozitive. Por situata pozitive është e përmbysshme”, tha Rama.
Megjithatë nga java e ardhshme do ketë një lehtësim të lëvizjes, kryesisht në zonat që nuk janë prekur nga koronavirusi.
Rama tha se do të bëhet relaksim lëvizjesh në qarkun Gjirokastër, në qarkun Dibër, por edhe në Librazhd, në Pogradec, Divjakë e Himarë, vennde që sipas tij kanë risk të ulët.
“Kancelarja gjermane na ka vënë në dispozicion një grup ekspertësh gjermanë, me kërkesën time. Mos përdorni kot më kot shembuj Gjermania, Suedia, Norvegjia etj. Ua konfirmoj se edhe me ekspertë gjermanë kemi provuar saktësinë tonë strategjike. Ekspertët që kanë mandat institucional na kanë dhënë të drejtë. Nga fillimi i javës tjetër do ketë relaksim më të madh në disa zona të vendit, jo në Tiranë, ku ka shumë popullatë. Do lejohet lëvizje e relaksuar ku ka risk të ulët. Qarku Gjirokastër e qarku Dibër do jetë zonë që do ketë më shumë lehtësim lëvizjesh, edhe Divjaka, Saranda, Himara do kenë liri lëvizjeje. Pogradec, Përrenjas e Librazhd janë po ashtu zona me rrezik të ulët”, tha Rama.
Mirëpo, pavarësisht se masat shtrënguese do të lehtësohen me kalimin e kohës, normalitet nuk do të ketë dhe, sipas kreut të qeverisë, do na duhet që të përshtatemi me normalitetin e ri.
Në këtë normalitet të ri, Rama thotë se nuk ka më “tufë” të gjithë në autobuse, restorante kafene apo nëpër plazhe, por as nuk do të rrimë brenda,
Ajo çka do bëjmë sipas tij është se do dalim, por duhet të bashkëjetojmë me këtë rrezik në çdo hap.
Edi Rama u shpreh:
“Ajo që duhet të kuptojmë të gjithë është që virusi nuk ikën. Nuk ikën meqë në po mbyllemi në shtëpi. Është aty, prapa dritares, prapa derës. Harrojeni normalitetin që kemi pasur, harrojeni. Deri kur të dalë vaksina normaliteti që kishim nuk do të jetë më ai i mëparshmi…Normaliteti i ri do te jetë ndryshe. Edhe kur të dalim, do dalim, por do sillemi ndryshe. Nuk ka më dhënie dore, nuk ka më futu të gjithë në autobus, nuk ka më shko të gjithë në plazh rrëmujë e bëj transmetim me valë aavujsh djerse, alkooli, nëpër pube. Nuk ka më, nuk ekziston. Sigurisht që nuk do rrime brenda të gjithë, do dalim, por duhet të bashkëjetojmë me këtë rrezik në çdo hap. Mjafton pak për t’i bërë gjëmën të gjithë popullit, pastaj do ta shohin mirë të gjithë ata që kanë dyshime…do e kishim parë nëse nuk do i kishim marrë këto masa bashkarisht.”
https://www.facebook.com/edirama.al/videos/672188443558090/
