Ditën e sotme Federata Shqiptare e Futbollit ka njoftuar se këtë fundjavë do të fillojë edicioni i ri futbollistik 2020/2021 në Kategorinë e Parë, Kategorinë e Dytë dhe në të gjitha nivelet e moshave.
Por FSHF me këtë vendim ka hedhur poshtë kërkesat e Kategorisë Superiore e cila është më e rëndësishmja për kampionatin futbollistik në vend, pasi në fund të fundit nga kjo kategori vijnë edhe përfitimet më të mëdhaja për federatën tonë.
Prej më shumë se dy muajsh Kategoria Superiore dhe Liga Profesioniste kanë bojkotuar fillimin e sezonit të ri pasi duan që qeveria të plotësojë katër kërkesa që sipas tyre janë shumë të rëndësishme për futbollistët por edhe vetë klubet.
Klubet kanë kërkuar ulje të tatimit mbi vlerën e shtuar (tvsh) në masën 6 për qind, faljen e gjobave dhe kamatvonesave për detyrimet tatimore, pezullim të tatimit mbi të ardhurat për sportistët nga dy në dhjetë vite, si dhe miratimin e një ligji të përshtatshëm në favor të sponsorizuesve të sportit.
I dërguari i qeverisë për negocimin e këtyre kërkesave, deputeti Fidel Ylli ka njoftuar ditën e sotme se qeveria do t’i plotësojë këto kërkesa por nuk duhet negociuar mbi afate dhe kushte, pasi sipas tij gjithçka arrihet me dialog.
Pas njoftimit se Kryeministri ka mirëkuptimin “në parim” për realizimin e katër kërkesave të klubeve të Superiores, Ylli i ka bërë thirrje Ligës që “miqësisht të mos vonojë procesin e realizimit të tyre me vazhdimin e bojkotit”.
“Në vijim të qëndrimit tim të konsoliduar, ju sugjeroj që të rifilloni aktivitetin sportiv, pasi çdo ditë e humbur është në dëm të sportit dhe në dëm të zgjidhjeve, për të cilat kemi bashkëpunuar kaq seriozisht javët e fundit,” – shprehet Ylli.
Liga Profesioniste do të mblidhet përsëri nesër për të vendosur në lidhje me të ardhmen e tyre, ndeshjet dhe mbarimin e bojkotit, pasi të gjitha takimet e deri tanishme nuk kanë rezultuar efektive dhe ende nuk është gjetur një zgjidhje. Pritet që pas njoftimit të sotëm nga Fidel Ylli se janë pranuar kërkesat e tyre, Liga të marrë një vendim që të jetë i kenaqshëm jo vetëm për Ligën, FSHF-në dhe qeverinë por edhe për tifozët të cilët janë në pritje të ndeshjeve nga ekipet e Superiores.
