Zbardhen detaje nga dosja hetimore që implikon drejtuesin e Komisionit të Prokurimeve Publike, Jonaid Myzyri, në një aferë tenderimi me vlerë 2.3 milionë euro për mirëmbajtjen e një aksi rrugor 58.7 kilometra (“Rrëshen – Ura e Fanit – Shpal – Ura e Repsit”).
Dosja e SPAK përmban përgjime telefonike, në të cilat një punonjëse e KPP-së, Lindita Skeja, përmend drejtpërdrejt Myzyrin si personin që ka diktuar mënyrën e veprimit të komisionit në shqyrtimin e ankesave për këtë tender.
Në një nga bisedat e përgjuara, Skeja shfaq shqetësim se po merrej në pyetje për një firmë që, sipas saj, e kishte vendosur nën presionin e Myzyrit. Ajo i shprehet bashkëbiseduesit me ironi dhe zemërim: “Vajta i shërbeva si qeni. I shërbeva me sy mbyll… firmosim ne, të gjithë si delet. Ne vemi ku na thërrasin. Firmën ne, lekët ata.”
Nga hetimet e deritanishme, rezulton se drejtuesi i pezulluar i KPP-së, Jonaid Myzyri, është marrë zyrtarisht i pandehur më 24 qershor 2025 dhe ndaj tij është ngritur akuza për “shpërdorim detyre” dhe “shkelje të barazisë në tendera”.
SPAK ka theksuar se komunikimet telefonike janë pjesë kyçe në ndërtimin e akuzës, duke zbuluar një skemë të dyshuar presioni dhe ndikimi të drejtpërdrejtë ndaj anëtarëve të institucionit.
Përgjimi i SPAK
Speaker A (Lindita): Ai na majti kshu… që krijum besim që ne jemi miqtë e atij…ene rrimë të qetë. N’a ofroi mori informacione. Unë vajta dhe i shërbeva si qeni.
Speaker B: Hej zot!
Speaker A (Lindita): Vajta i shërbeva si qeni. I shërbeva me sy mbyll… e du edhe pikë. E du kshtu…firmos ne, të gjith si delet. Ime veme ku të n’a thërrasin. Rresht. Firmën ne e lekët ata.
Speaker B: A mos i hongert o Zot.
Speaker A (Lindita): Bojna se e dini ju se ç’ju boj unë, bojna… Më pas
Speaker A (Lindita): Amin…ata hop mrap ere… hop mrapa… hop mrapa me e çoi mu në KPP… më çoi mu në KPP, përballem atje me lloj lloj pislliku…
Speaker B: Pi hiç ere un sve po ene tha Dashi motrës tha mos shko…
Sipas SPAK, nga analizimi i përgjimeve telefonike rezulton se vendimet e KPP mund të jenë ndikuar në mënyrë të jashtëligjshme, jo vetëm për këtë rast konkret, por edhe në vendimmarrje të tjera përgjatë viteve të fundit.
Në kërkesën zyrtare drejtuar Gjykatës së Posaçme për caktimin e masës së sigurisë, prokurori Elvin Gogaj argumenton se Jonaid Myzyri përbën rrezik për hetimin, për shkak të mundësisë së ndërhyrjes tek persona ende të papyetur, cenimit të provave, por edhe rrezikut për t’u larguar apo për të kryer vepra të tjera penale.
“Ekzistojnë indicie të mjaftueshme se i hetuari mund të ndërhyjë për të deformuar provat apo për të ndikuar te personat që kanë dijeni për ngjarjen,” thekson Prokuroria.
Ndërkohë, hetimi i SPAK është zgjeruar dhe përfshin procedura të zhvilluara nga KPP gjatë viteve 2020–2023. Sipas të dhënave paraprake, një numër i konsiderueshëm tenderësh rezulton se janë zhvilluar pa konkurrencë reale ose me pjesëmarrjen e vetëm një operatori ekonomik, ose me skualifikime të dyshimta të kompanive të tjera.
Jonaid Myzyri është emëruar në krye të KPP-së në vitin 2020 për një mandat pesëvjeçar, me propozim të Këshillit të Ministrave dhe votim në Kuvendin e Shqipërisë. Aktualisht, ai ndodhet nën masën e sigurisë “detyrim paraqitjeje”, ndërsa hetimet për abuzime të mundshme në institucionin që drejtonte vijojnë në dinamikë.
