Në një nga deklaratat absurde të politikës shqiptare, sekretari i përgjithshëm i Partisë Demokratike, Flamur Noka, vendosi t’u tregojë shqiptarëve një realitet të ri imagjinar: në Shqipëri nuk ka oligarkë. Samir Mane, Shefqet Kastrati, Bashkim Ulaj? Jo, thjesht “individë”. Sipas Nokës, i vetmi oligark – madje “kryeoligark” – është Edi Rama.
Në emisionin “Të Paekspozuarit” në MCN TV, Noka hodhi poshtë çdo përpjekje për të quajtur këta biznesmenë oligarkë, duke akuzuar madje edhe Endri Fugën për “kurthe” ndaj PD-së.
Në një kohë kur të gjithë i shohin dhe njohin aferat ku oligarkët bashkëpunojnë ngushtë me politikën në vend (pozitë dhe opozitë), Noka ashtu si të tjerët, jo vetëm që nuk guxon të përmendë emra dhe të bëjë denoncime konkrete, por shkon edhe më tej: nuk pranon as t’i quajë më oligarkë.
Për Nokën, pyetjet për oligarkët nuk janë as legjitime dhe as të domosdoshme – janë thjesht “provokime” për të prishur marrëdhëniet e Partisë Demokratike me biznesin.
Në këtë farsë politike, edhe Andi Bushati nuk i kurseu ironitë, duke vënë në dukje se Noka e PD, nga frika për të mos u prishur me “sponsorët”, zgjedhin të shpikin një realitet ku vetëm njëri është fajtor, ndërsa të tjerët përjashtohen nga çdo përgjegjësi. Një akrobaci politike që sfidon çdo sens kritik.
Më poshtë gjeni të plotë bisedën e zhvilluar mes Flamur Nokës, Ylli Rakipit dhe Andi Bushatit:
Biseda e plotë:
Flamur Noka: Mane dhe Kastrati s’janë oligarkë, këto pyetje i bën Fuga për të na prishur me biznesin!
Ylli Rakipi: Ka një perceptim që PD dhe PS janë njëlloj, kanë të njëjtat interesa dhe u shërbejnë këtyre interesave. Përshembull, ju oligarkët i doni njëlloj. Pse nuk i përmendni ata? Samir Mane a është oligark? A i ka shërbyer Edi Ramës dhe a ka përfituar prej tij? Pse nuk e denonconi?
Flamur Noka: Jo nuk është oligark. Ka vetëm një oligark dhe ky është Edi Rama. Të gjithë janë shërbëtorë të tij dhe harroje. Është të gënjesh veten dhe të mashtrosh të tjerët me dashakeqësi.
Ylli Rakipi: Shefqet Kastrati është oligark?
Flamur Noka: Jo. Mos u lodh të bësh pyetje.
Andi Bushati: Mos e pyet fare.
Flamur Noka: Oligark dhe kryeoligark është Edi Rama.
Ylli Rakipi: Ulaj është oligark?
Flamur Noka: Jo.
Ylli Rakipi: Sa bukur e keni gjetur këtë, që Edi Rama qenka oligarku…
Flamur Noka: Zotëri e gjitha kjo lojë spinohet nga kuzhina e Fugës për të kundërvënë me biznesin PD-në.
Ylli Rakipi: Domethënë këtë pyetje mua ma ka dhënë Endri Fuga?
Flamur Noka: Po. PD-ja është parti e djathtë, nuk sulmon biznesin.
Ylli Rakipi: Endri Fuga turp të kesh.
Flamur Noka: Çdo biznes apo biznesmen që fiton në mënyrë të paligjshme e kemi denoncuar. Por që unë të hyj në lojën e Fugës dhe të Ramës dhe të mos merrem me kryeoligarkun dhe të merrem me biznesin, kurrë s’ke për ta patur te unë.
Andi Bushati: Jo mos hyni, se ata PS-në do të financojnë. Atë do edhe Rama.
Ylli Rakipi: E paskan zgjidhur mirë këtë, të thonë që Rama i ka këto. Po kur ishin në kohën tuaj i kishte Saliu?
Flamur Noka: Unë nuk thashë që i ka Rama. Në Shqipëri ka një oligark dhe kryeoligark dhe ky është Edi Rama. Të tjerët janë ose individë…
Andi Bushati: Nuk i thonë Putinit oligark, por thonë oligarkët e Putinit. Ju nga halli se nuk thoni dot këta, caktoni Ramën.
Flamur Noka: Mos më bëj marksistin këtu. Kur u vu trau unë kam qenë në betejë. Kur u vu trau këtu unë dhe PD kemi qenë në betejë dhe kemi denoncuar. Kur u ndërtua tuneli i Palasës, Sali Berisha dhe PD kanë denoncuar, pra çdo akt që mban erë korruptive ne e denoncojmë.
